ബംഗളൂരു: അഡുഗോഡിയിലെ ഫ്ലാറ്റിനുള്ളിൽ യുവതിയെ രക്തത്തിൽ കുളിച്ച നിലയിൽ മരിച്ച നിലയിൽ കണ്ടെത്തി (Bengaluru Crime News). തിങ്കളാഴ്ചയാണ് മൃതദേഹം പോലീസ് കണ്ടെടുത്തത്. മൃതദേഹത്തിന് മൂന്ന് ദിവസത്തോളം പഴക്കമുണ്ടെന്നാണ് പ്രാഥമിക നിഗമനം. ഫ്ലാറ്റിൽ നിന്ന് അസഹനീയമായ ദുർഗന്ധം ഉയർന്നതോടെ അയൽവാസികൾ പോലീസിനെ അറിയിക്കുകയായിരുന്നു. പോലീസ് വാതിൽ തകർത്ത് അകത്തുകടന്നപ്പോഴാണ് ഭാഗികമായി അഴുകിയ നിലയിൽ മൃതദേഹം കണ്ടത്.
പൂജയുടെ മൃതദേഹം രക്തത്തിൽ കുളിച്ച നിലയിലായിരുന്നു. മുറിക്കുള്ളിൽ പേപ്പർ കഷണങ്ങൾ ചിതറിക്കിടക്കുന്ന നിലയിലായിരുന്നുവെങ്കിലും ആത്മഹത്യാ കുറിപ്പുകൾ ഒന്നും ലഭിച്ചിട്ടില്ല. ഏപ്രിൽ 23-നാണ് പൂജയെ അവസാനമായി പുറത്തുകണ്ടതെന്ന് വീട്ടുടമസ്ഥ പോലീസിനോട് പറഞ്ഞു. അന്ന് സാധനങ്ങൾ വാങ്ങാനായി പുറത്തിറങ്ങിയതായിരുന്നു യുവതി.
ഫ്ലാറ്റിന്റെ വാതിൽ അകത്തുനിന്ന് പൂട്ടിയ നിലയിലായിരുന്നു. അതിനാൽ ആത്മഹത്യയാണോ അതോ മറ്റെന്തെങ്കിലും അസ്വാഭാവിക കാരണങ്ങളുണ്ടോ എന്ന് പോലീസ് പരിശോധിച്ചുവരികയാണ്. അസ്വാഭാവിക മരണത്തിന് കേസെടുത്ത അഡുഗോഡി പോലീസ് പോസ്റ്റ്മോർട്ടം റിപ്പോർട്ടിനായി കാത്തിരിക്കുകയാണ്.
