ചെന്നൈ: തമിഴ്നാട്ടിലെ കമ്മ്യൂണിസ്റ്റ് പ്രസ്ഥാനത്തിന്റെ കരുത്തുറ്റ മുഖവും സി.പി.ഐ മുൻ സംസ്ഥാന സെക്രട്ടറിയുമായ ആർ. നല്ലകണ്ണ് (101) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് ചെന്നൈയിലെ രാജീവ് ഗാന്ധി ഗവൺമെന്റ് ജനറൽ ആശുപത്രിയിൽ ചികിത്സയിലിരിക്കെ ബുധനാഴ്ച ഉച്ചയ്ക്ക് 1:55-നായിരുന്നു അന്ത്യം. തമിഴ്നാട് മുഖ്യമന്ത്രി എം.കെ. സ്റ്റാലിൻ ഉൾപ്പെടെയുള്ള പ്രമുഖ നേതാക്കൾ കഴിഞ്ഞ ദിവസങ്ങളിൽ അദ്ദേഹത്തെ സന്ദർശിച്ചിരുന്നു.(A strong face in Tamil politics, Senior CPI leader R Nallakannu passes away)
ദീർഘകാലം സി.പി.ഐയുടെ തമിഴ്നാട് സംസ്ഥാന സെക്രട്ടറിയായിരുന്ന നല്ലകണ്ണ്, രാഷ്ട്രീയത്തിലെ ലാളിത്യത്തിന്റെയും സത്യസന്ധതയുടെയും പര്യായമായാണ് അറിയപ്പെട്ടിരുന്നത്. കർഷക പ്രസ്ഥാനങ്ങൾ കെട്ടിപ്പടുക്കുന്നതിലും ജാതിവിരുദ്ധ പോരാട്ടങ്ങൾ നയിക്കുന്നതിലും അദ്ദേഹം നിർണ്ണായക പങ്ക് വഹിച്ചു.
1999-ൽ കോയമ്പത്തൂരിൽ നിന്ന് ലോക്സഭയിലേക്ക് മത്സരിച്ചിട്ടുണ്ട്. തമിഴ്നാട് സർക്കാരിന്റെ പ്രഥമ ‘തഗൈസൽ തമിഴർ’ പുരസ്കാരം, അംബേദ്കർ പുരസ്കാരം തുടങ്ങി നിരവധി ബഹുമതികൾ നൽകി അദ്ദേഹത്തെ ആദരിച്ചിട്ടുണ്ട്.
