ന്യൂഡൽഹി: ഡൽഹിയിലെ ദ്വാരക സെക്ടർ 24-ലെ ഗോൾഫ് കോഴ്സിലുണ്ടായ അപകടത്തിൽ എട്ടിനും പത്തിനും ഇടയിൽ പ്രായമുള്ള മൂന്ന് കുട്ടികൾ മുങ്ങിമരിച്ചു. വ്യാഴാഴ്ച രാവിലെയാണ് സംഭവം നടന്നതെന്ന് പോലീസ് അറിയിച്ചു.(3 Children Drown In Pond At Golf Course In Delhi)
രാവിലെ 7.07-ഓടെയാണ് അപകടം സംബന്ധിച്ച സന്ദേശം സെക്ടർ 23 പോലീസ് സ്റ്റേഷനിൽ ലഭിക്കുന്നത്. ഉടൻ തന്നെ പോലീസും അഗ്നിശമന സേനയും സ്ഥലത്തെത്തി. ഗോൾഫ് കോഴ്സിനുള്ളിലെ കുളത്തിൽ കുട്ടികളുടെ മൃതദേഹങ്ങൾ കണ്ടെത്തുകയായിരുന്നു. അഗ്നിശമന സേനാംഗങ്ങളുടെ സഹായത്തോടെയാണ് മൃതദേഹങ്ങൾ പുറത്തെടുത്തത്.
കുളത്തിന്റെ കരയിൽ നിന്ന് കുട്ടികളുടെ വസ്ത്രങ്ങൾ കണ്ടെത്തി. കുളത്തിൽ കുളിക്കാനായി ഇറങ്ങിയപ്പോഴാകാം അപകടം സംഭവിച്ചതെന്നാണ് പോലീസിന്റെ പ്രാഥമിക നിഗമനം. മൃതദേഹങ്ങൾ പോസ്റ്റ്മോർട്ടത്തിനായി അയച്ചു. സംഭവസ്ഥലത്ത് നിന്ന് കൂടുതൽ തെളിവുകൾ ശേഖരിക്കാനായി ഫോറൻസിക് സംഘത്തെയും വിളിച്ചിട്ടുണ്ട്.
