തിരുവനന്തപുരം: ആറ്റിങ്ങൽ കടയ്ക്കാവൂരിൽ ഹോട്ടലിൽ നിന്ന് ഷവായി കഴിച്ച നിരവധി പേർക്ക് ഭക്ഷ്യവിഷബാധയേറ്റു (Kadakkavoor Food Poisoning). കടയ്ക്കാവൂർ തെക്കുംഭാഗത്ത് പ്രവർത്തിക്കുന്ന ‘വി മാർട്ട്’ എന്ന വ്യാപാര സ്ഥാപനത്തിൽ നിന്നും കഴിഞ്ഞ ദിവസം ഷവായി വാങ്ങി കഴിച്ചവർക്കാണ് കടുത്ത ശാരീരിക അസ്വസ്ഥതകൾ ഉണ്ടായത്. ഇതേത്തുടർന്ന് ശ്വാസംമുട്ട്, വിട്ടുമാറാത്ത ഛർദി, വയറിളക്കം എന്നിവ അനുഭവപ്പെട്ട പത്തോളം പേരെ വിവിധ ആശുപത്രികളിൽ പ്രവേശിപ്പിച്ചു. ഇവരിൽ ചിലരുടെ നില ഇപ്പോഴും നിരീക്ഷണത്തിലാണ്.
ഭക്ഷ്യവിഷബാധ റിപ്പോർട്ട് ചെയ്തതിനെ തുടർന്ന് ആരോഗ്യ വകുപ്പ് അധികൃതർ നടത്തിയ പ്രാഥമിക പരിശോധനയിൽ ഞെട്ടിക്കുന്ന വിവരങ്ങളാണ് പുറത്തുവന്നത്. ജനങ്ങൾക്ക് ഭക്ഷണം പാകം ചെയ്തു നൽകിയിരുന്ന ഈ സ്ഥാപനത്തിന് ഗ്രാമപഞ്ചായത്തിന്റെയോ ആരോഗ്യ വിഭാഗത്തിന്റെയോ യാതൊരുവിധ ഔദ്യോഗിക ലൈസൻസുകളും ഉണ്ടായിരുന്നില്ലെന്ന് കണ്ടെത്തി. യാതൊരു സുരക്ഷാ മാനദണ്ഡങ്ങളും പാലിക്കാതെ തികച്ചും അശാസ്ത്രീയമായാണ് ഇവിടെ ഭക്ഷണം കൈകാര്യം ചെയ്തിരുന്നത്.
തുടർന്ന് ആരോഗ്യ വിഭാഗം ഉദ്യോഗസ്ഥർ സംഭവസ്ഥലത്തെത്തി കട അടിയന്തരമായി അടപ്പിച്ചു. പരിശോധനയിൽ പഴകിയ ചിക്കനും മറ്റ് ഭക്ഷ്യവസ്തുക്കളും പിടിച്ചെടുത്തതായാണ് സൂചന. ഇവ ശാസ്ത്രീയ പരിശോധനയ്ക്കായി ലാബിലേക്ക് അയച്ചു. ലൈസൻസില്ലാതെയും വൃത്തിഹീനമായ സാഹചര്യത്തിലും പ്രവർത്തിച്ച കടയുടെ ഉടമസ്ഥർക്കെതിരെ പകർച്ചവ്യാധി പ്രതിരോധ നിയമപ്രകാരവും ഭക്ഷ്യസുരക്ഷാ നിയമപ്രകാരവും കർശനമായ നിയമനടപടികൾ സ്വീകരിക്കുമെന്ന് ആരോഗ്യ വകുപ്പ് അധികൃതർ അറിയിച്ചു.
Story Summary:
Around ten people were hospitalized due to food poisoning after consuming Shawai from ‘V Mart’ shop in Kadakkavoor, Attingal. Following the incident, health department officials inspected the shop and ordered it to be shut down after discovering that it was operating without a valid license from the panchayat or the health department.
