താമരശ്ശേരി: വിവാഹനിശ്ചയത്തിനായുള്ള ഒരുക്കങ്ങൾ കുടുംബത്തിൽ പുരോഗമിക്കുന്നതിനിടെ യുവതിയെ വീടിനുള്ളിൽ മരിച്ച നിലയിൽ കണ്ടെത്തി (Nandana Pradeep Thamarassery death). താമരശ്ശേരി അമ്പായത്തോട് മിച്ചഭൂമി ഒന്നാം പ്ലോട്ടിൽ താമസിക്കുന്ന ചേലോട്ടിൽ പ്രദീപ് കുമാർ-ബിന്ദു ദമ്പതികളുടെ മകൾ നന്ദന പ്രദീപ് (22) ആണ് തിങ്കളാഴ്ച ഉച്ചയ്ക്ക് 12 മണിയോടെ തൂങ്ങിമരിച്ച നിലയിൽ കണ്ടെത്തിയത്.
സംഭവം നടക്കുമ്പോൾ നന്ദനയുടെ ഇളയ സഹോദരി മാത്രമാണ് വീട്ടിൽ ഉണ്ടായിരുന്നത്. മുറിയിൽ ഉറങ്ങുകയായിരുന്ന സഹോദരി ഉണർന്ന് പുറത്തേക്ക് വന്നപ്പോഴാണ് നന്ദനയെ വീടിന്റെ ഡൈനിങ് ഹാളിൽ തൂങ്ങിയ നിലയിൽ കണ്ടെത്തിയത്. ഉടൻ തന്നെ പരിഭ്രാന്തയായ സഹോദരി പരിസരവാസികളെ വിവരമറിയിക്കുകയായിരുന്നു. നാട്ടുകാർ ചേർന്ന് യുവതിയെ ഉടൻ തന്നെ താമരശ്ശേരി താലൂക്ക് ആശുപത്രിയിൽ എത്തിച്ചുവെങ്കിലും അതിനോടകം തന്നെ മരണം സംഭവിച്ചിരുന്നു.
നന്ദനയുടെ വിവാഹ നിശ്ചയം നിശ്ചയിച്ചിരുന്നതിനാൽ അതിന്റെ മുന്നൊരുക്കങ്ങളുമായി കുടുംബം മുന്നോട്ട് പോകുന്നതിനിടയിലാണ് നാടിനെ നടുക്കിയ ദാരുണ സംഭവം ഉണ്ടായത്. വിവരമറിഞ്ഞ് താമരശ്ശേരി പോലീസ് താലൂക്ക് ആശുപത്രിയിലെത്തി പ്രാഥമിക ഇൻക്വസ്റ്റ് നടപടികൾ പൂർത്തിയാക്കി. മരണത്തിൽ എന്തെങ്കിലും തരത്തിലുള്ള അസ്വാഭാവികതയുണ്ടോ എന്ന് പോലീസ് അന്വേഷിച്ചുവരികയാണ്. മൃതദേഹം തുടർനടപടികൾക്കും കൃത്യമായ പോസ്റ്റ്മോർട്ടം പരിശോധനകൾക്കുമായി കോഴിക്കോട് മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി.
Story Summary: A 22-year-old woman named Nandana Pradeep was found dead by hanging inside her house at Ambayathode, Thamarassery, while preparations for her engagement were underway. Her younger sister discovered her in the dining hall. Although she was rushed to Thamarassery Taluk Hospital, she could not be saved. Thamarassery police completed the inquest and shifted the body to Kozhikode Medical College for post-mortem.
