തിരുവനന്തപുരം: വേനൽചൂടിൽ വലയുന്ന ജനങ്ങളെ പവർകട്ടിലൂടെ സർക്കാർ വീണ്ടും ദുരിതത്തിലാഴ്ത്തുകയാണെന്ന് രമേശ് ചെന്നിത്തല ആരോപിച്ചു (Ramesh Chennithala News). ഏപ്രിൽ, മെയ് മാസങ്ങളിൽ കേരളത്തിൽ അത്യുഷ്ണം ഉണ്ടാകുമെന്ന് മുൻകൂട്ടി അറിയാമായിരുന്നിട്ടും ആവശ്യത്തിന് വൈദ്യുതി ഉറപ്പാക്കാൻ കെഎസ്ഇബിക്ക് സാധിച്ചില്ലെന്നും അദ്ദേഹം കുറ്റപ്പെടുത്തി. അടുത്ത 25 വർഷത്തേക്ക് വൈദ്യുതി ലഭ്യമാക്കാൻ യുഡിഎഫ് സർക്കാർ ഒപ്പുവെച്ച രണ്ട് ദീർഘകാല കരാറുകൾ പിണറായി സർക്കാർ നിസ്സാര സാങ്കേതിക കാരണങ്ങൾ പറഞ്ഞ് റദ്ദാക്കിയതാണ് ഇപ്പോഴത്തെ പ്രതിസന്ധിക്ക് കാരണമെന്ന് അദ്ദേഹം പറഞ്ഞു.
ഉയർന്ന വിലയ്ക്ക് ഒപ്പിട്ട ഹ്രസ്വകാല കരാറുകളുടെ കാലാവധി അവസാനിച്ചിട്ടും, വേനൽക്കാലം കണക്കിലെടുത്ത് അവ നീട്ടാനോ പകരം സംവിധാനം ഒരുക്കാനോ സർക്കാർ തയ്യാറായില്ല. ജനങ്ങളെ ശിക്ഷിക്കുന്ന നടപടിയിൽ നിന്ന് സർക്കാർ പിന്മാറണം. രാത്രികാലങ്ങളിൽ ഒരു കാരണവശാലും വൈദ്യുതി നിയന്ത്രണം ഏർപ്പെടുത്തരുത്-അദ്ദേഹം ആവശ്യപ്പെട്ടു.
നോക്കുകുത്തിയായി മാറിയ ബോർഡിനും വീഴ്ചവരുത്തിയ ഉദ്യോഗസ്ഥർക്കുമെതിരെ ശക്തമായ നടപടിയെടുക്കണം. ഇത്രയും ജനദ്രോഹപരമായ ഒരു സർക്കാരും ബോർഡും ഇതിനുമുമ്പ് ഉണ്ടായിട്ടില്ലെന്നും ചെന്നിത്തല കൂട്ടിച്ചേർത്തു. വരും ദിവസങ്ങളിൽ സംസ്ഥാനത്ത് വൈദ്യുതി ഉപഭോഗം റെക്കോർഡ് ഭേദിക്കാനിരിക്കെയാണ് പ്രതിപക്ഷത്തിന്റെ ഈ നീക്കം.
Story Summary: Congress leader Ramesh Chennithala has slammed the Kerala government and KSEB over the current power crisis, calling the power cuts a “man-made disaster.” He criticized the government for cancelling long-term power agreements initiated by the previous UDF government and failing to ensure adequate supply during peak summer months. Chennithala demanded an immediate end to power regulations, especially at night, and called for action against negligent officials.
