തിരുവനന്തപുരം: മുൻ മുഖ്യമന്ത്രി പിണറായി വിജയന് ജന്മദിനാശംസകൾ നേർന്ന് കക്ഷിരാഷ്ട്രീയ ഭേദമന്യേ നിരവധിയാളുകൾ രംഗത്തെത്തുമ്പോൾ, അദ്ദേഹത്തിന് പിന്തുണയുമായി പി.എ. മുഹമ്മദ് റിയാസ് പങ്കുവെച്ച ഫേസ്ബുക്ക് കുറിപ്പ് ശ്രദ്ധേയമാകുന്നു (Pinarayi Vijayan Birthday Wishes Mohammed Riyas). തളരാത്ത മനസ്സിനും പതറാത്ത നിലപാടുകൾക്കും ജന്മദിനാശംസകൾ നേർന്ന റിയാസ്, കോർപ്പറേറ്റ് മാധ്യമങ്ങളും ഫ്യൂഡൽ വരേണ്യതയും പിണറായി വിജയനെ നിരന്തരമായി വ്യക്തിപരമായി ആക്രമിച്ച് തകർക്കാൻ ശ്രമിക്കുകയാണെന്ന് കുറിപ്പിൽ ആരോപിച്ചു. പ്രായത്തിന്റെ പേരിൽ ആക്ഷേപിക്കുന്നവർക്കും മാധ്യമ വേട്ടയാടലുകൾക്കും ഇരയാകുന്ന അവഗണിക്കപ്പെട്ട ജനവിഭാഗങ്ങളുടെ ശക്തമായ ശബ്ദമായി ഈ മനുഷ്യൻ ഇനിയുമുണ്ടാകുമെന്നും അദ്ദേഹം കൂട്ടിച്ചേർത്തു. സകല ജനാധിപത്യ മര്യാദകളും ലംഘിച്ചുകൊണ്ട് കടുത്ത അപവാദ പ്രചരണങ്ങളാണ് ഇപ്പോഴും അദ്ദേഹത്തിനെതിരെ ഒരു വിഭാഗം തുടർന്നുപോരുന്നത്.
മുഖ്യമന്ത്രി പദവിയിൽ ഇരുന്ന നേതാവ് തൊട്ടുപിന്നാലെ പ്രതിപക്ഷ നേതാവായി ചുമതലയേറ്റത് എന്തോ അസാധാരണമായ സംഭവം എന്ന രീതിയിലാണ് നിലവിലെ ചില രാഷ്ട്രീയ പ്രചരണങ്ങൾ നടക്കുന്നത്. എന്നാൽ കേരള രാഷ്ട്രീയ ചരിത്രത്തിൽ ഇത് പുതിയൊരു സംഭവമല്ലെന്നും മുൻ മുഖ്യമന്ത്രിമാരായ ഇ.എം.എസ്, ഇ.കെ. നായനാർ, വി.എസ്. അച്യുതാനന്ദൻ എന്നിവരും ഇതേ പാത പിന്തുടർന്നവരാണെന്നും റിയാസ് ഓർമ്മിപ്പിച്ചു. ഇടതുപക്ഷ നേതാക്കൾ മാത്രമല്ല, യു.ഡി.എഫ് ക്യാമ്പിലെ പ്രമുഖരായ കെ. കരുണാകരൻ, എ.കെ. ആന്റണി, ഉമ്മൻ ചാണ്ടി എന്നിവരും മുഖ്യമന്ത്രി സ്ഥാനം ഒഴിഞ്ഞ ശേഷം പ്രതിപക്ഷ നേതാക്കളായി സഭയിൽ ഇരുന്നിട്ടുണ്ടെന്ന ചരിത്രവസ്തുത അദ്ദേഹം ചൂണ്ടിക്കാട്ടി. വ്യക്തിപരമായ അധിക്ഷേപങ്ങളെയും രാഷ്ട്രീയ വേട്ടയാടലുകളെയും അതിജീവിച്ച് പിണറായി വിജയൻ ജനങ്ങൾക്കിടയിൽ തുടർന്നും ശക്തമായി നിലകൊള്ളുമെന്നും റിയാസ് ഫേസ്ബുക്കിൽ കുറിച്ചു.
Summary: Minister PA Mohammed Riyas extended birthday wishes to former Chief Minister Pinarayi Vijayan through a supportive Facebook post. Riyas heavily criticized corporate media and political opponents for targeted personal attacks and age-related insults against the veteran leader. He also reminded critics that a former Chief Minister serving as the Opposition Leader is a common practice in Kerala’s political history, citing examples from both the LDF and UDF.
