കൊച്ചി: ‘കസബ’ എന്ന സിനിമയിലെ സ്ത്രീവിരുദ്ധതയെ വിമർശിച്ചതിന് പിന്നാലെ നേരിടേണ്ടി വന്ന കടുത്ത സൈബർ ആക്രമണങ്ങളെക്കുറിച്ചും മാനസിക സംഘർഷങ്ങളെക്കുറിച്ചും തുറന്നുപറഞ്ഞ് നടി പാർവ്വതി തിരുവോത്ത് (Parvathy Thiruvothu Kasaba Movie Controversy). ഒരു യൂട്യൂബ് ചാനലിന് നൽകിയ അഭിമുഖത്തിലാണ് താരം തന്റെ ജീവിതത്തെ മാറ്റിമറിച്ച ആ കാലഘട്ടത്തെക്കുറിച്ച് മനസ്സ് തുറന്നത്.
സൈബർ ആക്രമണം തുടങ്ങിയതിന് പിന്നാലെ താൻ മമ്മൂട്ടിയുമായി സംസാരിച്ചിരുന്നുവെന്ന് പാർവ്വതി വ്യക്തമാക്കി. “മമ്മൂട്ടി സാർ വളരെ ശാന്തനായിരുന്നു. താങ്കൾ ശാന്തനായിരിക്കാം, എന്നാൽ പുറത്തുള്ളവർ അങ്ങനെയല്ല, ഒരു പ്രസ്താവനയെങ്കിലും ഇറക്കിക്കൂടെ എന്ന് ഞാൻ അദ്ദേഹത്തോട് ചോദിച്ചു. എന്നാൽ അദ്ദേഹം പ്രതികരിച്ചപ്പോഴേക്കും എല്ലാം കൈവിട്ടുപോയിരുന്നു,” പാർവ്വതി പറഞ്ഞു.
വിമർശനത്തിന് പിന്നാലെ കൊലവിളികളും ബലാത്സംഗ ഭീഷണികളും വരെ നേരിട്ടു. പുറത്തിറങ്ങാൻ പോലും പേടിയായ ആ കാലം തന്റെ ആരോഗ്യത്തെയും ബാധിച്ചുവെന്ന് താരം വെളിപ്പെടുത്തി. പതിനായിരങ്ങൾ പങ്കെടുത്ത ഒരു അവാർഡ് നിശയിൽ പുരസ്കാരം വാങ്ങാൻ സ്റ്റേജിലേക്ക് കയറിയപ്പോൾ ജനക്കൂട്ടം ഒന്നടങ്കം കൂകിവിളിച്ചു. ആ നിമിഷം തന്നെ വല്ലാതെ തളർത്തിയെന്നും എന്നാൽ തളരാതെ പ്രസംഗം പൂർത്തിയാക്കാൻ സ്വയം ഓർമ്മിപ്പിക്കുകയായിരുന്നുവെന്നും പാർവ്വതി ഓർക്കുന്നു.
സൈബർ ആക്രമണങ്ങൾക്കിടയിലും ആസിഫ് അലി, ടൊവിനോ തോമസ് എന്നിവർ തനിക്കൊപ്പം നിന്നു. നിർമ്മാതാവ് പി.വി. ഗംഗാധരന്റെ മക്കൾ (എസ്ക്യൂബ് പ്രൊഡക്ഷൻസ്) ആ സമയത്ത് തന്നെ വിളിച്ച് സിനിമ നൽകി. ഒരു നടിക്ക് ലഭിക്കാവുന്ന ഏറ്റവും ഉയർന്ന പ്രതിഫലമാണ് ആ ചിത്രത്തിന് ലഭിച്ചതെന്നും പാർവ്വതി കൂട്ടിച്ചേർത്തു.
തനിക്കൊപ്പം നിന്നവർക്ക് സിനിമാ ഇൻഡസ്ട്രിയിൽ വലിയ സമ്മർദ്ദങ്ങൾ നേരിടേണ്ടി വന്നിട്ടുണ്ടെന്നും താൻ പോരാടുന്നത് ഒറ്റയ്ക്കല്ല, ഒരു കൂട്ടായ്മയുടെ പ്രതിനിധിയായാണെന്നും പാർവ്വതി പറഞ്ഞു. ഇന്ന് കാണുന്ന കരുത്തുറ്റ പാർവ്വതിയെ രൂപപ്പെടുത്തിയത് ആ പ്രതിസന്ധികളാണെന്ന് പറഞ്ഞാണ് താരം വാക്കുകൾ അവസാനിപ്പിച്ചത്.
Story Summary:
Actress Parvathy Thiruvothu opened up about the severe cyberattacks she faced after criticizing the misogyny in the film ‘Kasaba’. In a recent interview, she revealed that she had communicated with Mammootty during the crisis, but his response came too late to stop the abuse. She shared the trauma of being booed on a major award stage and receiving death threats. However, she credited friends like Asif Ali, Tovino Thomas, and S-Cube Productions for their support and stated that these experiences shaped the person she is today.
