തൃശ്ശൂർ: വി.ഡി. സതീശൻ മന്ത്രിസഭയിലെ ഏറ്റവും പ്രായം കുറഞ്ഞ മന്ത്രിയെന്ന റെക്കോർഡ് ഇനി മുപ്പത്തിയെട്ടുകാരനായ അഡ്വ. ഒ.ജെ. ജനീഷിന് സ്വന്തം. തൊഴിലുറപ്പ് തൊഴിലാളിയായ ഒരു അമ്മയുടെ മകനായി വളർന്ന്, പഠനച്ചെലവിനായി പെരുമ്പാവൂരിൽ സെക്യൂരിറ്റി ജീവനക്കാരനായും ഇന്റർനെറ്റ് കഫേയിലെ തൊഴിലാളിയായും ജോലി ചെയ്താണ് ജനീഷ് തന്റെ വിദ്യാഭ്യാസം പൂർത്തിയാക്കിയത്.(OJ Janeesh Youngest Minister In Kerala UDF Cabinet Profile Kodungallur MLA Victory)
ജീവിതത്തിലെ കടുത്ത പ്രതിസന്ധികളോട് നിരന്തരം പടവെട്ടി കയറിവന്ന ഒരു സാധാരണക്കാരന് ജനാധിപത്യം നൽകുന്ന ഏറ്റവും വലിയ അംഗീകാരം കൂടിയാണ് ജനീഷിന്റെ ഈ മന്ത്രിപദവി. പെരുമ്പാവൂരിലെ ഗവൺമെന്റ് പോളിടെക്നിക്കിൽ രണ്ടാം വർഷ ഡിപ്ലോമ വിദ്യാർത്ഥിയായിരിക്കുമ്പോഴാണ് ജനീഷിന്റെ ജീവിതം മാറ്റിമറിച്ച ആ ദുരന്ത വാർത്തയെത്തുന്നത്. അച്ഛൻ ജനരഞ്ജൻ ജോലിസ്ഥലത്ത് കുഴഞ്ഞുവീഴുകയായിരുന്നു. ജനീഷ് ഓടിയെത്തിയപ്പോഴേക്കും അച്ഛന്റെ മരണം സംഭവിച്ചിരുന്നു.
തുടർന്ന്, കൂലിപ്പണിക്കും തൊഴിലുറപ്പ് ജോലിക്കും പോയാണ് അമ്മ പുഷ്പ തന്റെ രണ്ടു മക്കളെ പോറ്റിവളർത്തിയത്. കുടുംബത്തിലെ ദുരിതം തിരിച്ചറിഞ്ഞ ജനീഷ് പഠനത്തോടൊപ്പം പാർട്ട് ടൈം ജോലികൾ ചെയ്യാൻ തുടങ്ങി. സെക്യൂരിറ്റി ഗാർഡായും കഫേ ജീവനക്കാരനായും അധ്വാനിച്ചാണ് അദ്ദേഹം തന്റെ പഠനത്തിനുള്ള പണം കണ്ടെത്തിയത്. കഠിനമായ ഈ ജീവിതയാത്രയിലും പഠനവും രാഷ്ട്രീയ സംഘടനയും അദ്ദേഹം ഒരുപോലെ നെഞ്ചോടുചേർത്തു.
കുഴൂർ ഗവൺമെന്റ് ഹൈസ്കൂളിലും പുത്തൻവേലിക്കര വി.സി.എസ്.എച്ച്.എസ്.എസിലുമായി സ്കൂൾ വിദ്യാഭ്യാസം പൂർത്തിയാക്കിയ ജനീഷ്, പെരുമ്പാവൂർ പോളിടെക്നിക്കിൽ നിന്ന് ഇലക്ട്രോണിക്സ് ആൻഡ് കമ്മ്യൂണിക്കേഷൻ ഡിപ്ലോമയും പിന്നീട് തൃശ്ശൂർ ഗവൺമെന്റ് ലോ കോളേജിൽ നിന്ന് ബി.ബി.എ എൽ.എൽ.ബി ബിരുദവും കരസ്ഥമാക്കി അഭിഭാഷകനായി. ക്ലാസ് മുറികളിൽ നിന്ന് തുടങ്ങിയ രാഷ്ട്രീയ പ്രവർത്തനത്തിലൂടെ കെ.എസ്.യു യൂണിറ്റ് പ്രസിഡന്റ്, മാള നിയോജകമണ്ഡലം പ്രസിഡന്റ്, തൃശ്ശൂർ ജില്ലാ വൈസ് പ്രസിഡന്റ്, ജില്ലാ പ്രസിഡന്റ് എന്നീ പദവികൾ ജനീഷിനെ തേടിയെത്തി. പിന്നീട് യൂത്ത് കോൺഗ്രസ് തൃശ്ശൂർ ജില്ലാ അധ്യക്ഷനുമായി. പാലിയേക്കര ടോൾ പ്ലാസയിലെ കൊള്ളയ്ക്കെതിരെ ജനീഷ് നടത്തിയ സമരങ്ങൾ കേരള ശ്രദ്ധ പിടിച്ചുപറ്റിയിരുന്നു. ആ നിയമയുദ്ധം വിജയത്തിലെത്തിക്കാൻ ഈ യുവ അഭിഭാഷകന് സാധിച്ചു.
Story Summary
At 38, Youth Congress State President Adv OJ Janeesh becomes the youngest minister in the newly formed VD Satheesan UDF cabinet. Rising from extreme financial hardships, working as a security guard to fund his law studies, Janeesh achieved a historic upset victory by defeating CPI giant VR Sunil Kumar in the LDF stronghold of Kodungallur.
