കണ്ണൂർ: അഞ്ചരക്കണ്ടി ഡെന്റൽ കോളേജ് വിദ്യാർത്ഥി നിധിൻ രാജിന്റെ ആത്മഹത്യയുമായി ബന്ധപ്പെട്ട് കോളേജിലെ രണ്ട് അധ്യാപകർക്കെതിരെ പോലീസ് കേസെടുത്തു (Nithin Raj Suicide Case Update). ഡോ. എം.കെ. റാം, ഡോ. സംഗീത എന്നിവർക്കെതിരെയാണ് ആത്മഹത്യാ പ്രേരണാക്കുറ്റത്തിനും പട്ടികജാതി-പട്ടികവർഗ അതിക്രമ നിരോധന നിയമപ്രകാരവും (SC/ST Act) കേസെടുത്തതെന്ന് കണ്ണൂർ സിറ്റി പോലീസ് കമ്മിഷണർ അറിയിച്ചു.
നിധിനെ നിറത്തിന്റെയും ജാതിയുടെയും പേരിൽ അധ്യാപകർ നിരന്തരം അധിക്ഷേപിച്ചിരുന്നതായി പുറത്തുവന്ന ശബ്ദസന്ദേശങ്ങൾ ശരിവെക്കുന്നു. ‘തെരുവ് പട്ടി’ എന്ന് വിളിച്ചും ഇന്റേണൽ മാർക്ക് കുറച്ചും അധ്യാപകർ മാനസികമായി പീഡിപ്പിച്ചിരുന്നതായി നിധിൻ സഹോദരിക്ക് അയച്ച സന്ദേശത്തിലുണ്ട്.
നിധിൻ ലോൺ ആപ്പിൽ നിന്ന് പണമെടുത്തിരുന്നതായും അതിനായി ഒരു അധ്യാപികയുടെ ഫോൺ നമ്പർ നൽകിയിരുന്നതായും പോലീസ് കണ്ടെത്തി. ഇതുമായി ബന്ധപ്പെട്ട് അധ്യാപികയ്ക്ക് നിരന്തരം കോളുകൾ വന്നതിനെത്തുടർന്ന് അവർ പോലീസിൽ പരാതി നൽകിയിരുന്നു. ഈ സംഭവമുണ്ടാക്കിയ സമ്മർദ്ദവും മരണത്തിന് കാരണമായിട്ടുണ്ടോ എന്ന് അന്വേഷണസംഘം പരിശോധിക്കുന്നുണ്ട്.
സംഭവത്തിൽ സംസ്ഥാന മനുഷ്യാവകാശ കമ്മീഷൻ സ്വമേധയാ കേസെടുത്തു. ഒരാഴ്ചയ്ക്കകം റിപ്പോർട്ട് സമർപ്പിക്കാൻ സിറ്റി പോലീസ് കമ്മിഷണർക്ക് കമ്മീഷൻ നിർദ്ദേശം നൽകി.
കണ്ണൂർ എസിപി ആർ. ഹരിപ്രസാദിന്റെ നേതൃത്വത്തിലുള്ള ഏഴംഗ പ്രത്യേക സംഘമാണ് കേസ് അന്വേഷിക്കുന്നത്. നിധിന്റെ തിരുവനന്തപുരത്തെ വീട്ടിലെത്തി പോലീസ് മൊഴിയെടുക്കും. നിധിൻ ബോധപൂർവമാണോ അധ്യാപികയുടെ നമ്പർ നൽകിയത് അതോ ലോൺ ആപ്പുകൾ ഡാറ്റ ചോർത്തിയതാണോ എന്ന കാര്യത്തിൽ വ്യക്തത വരുത്താൻ ശാസ്ത്രീയ പരിശോധനകൾ നടത്തുമെന്നും കമ്മിഷണർ വ്യക്തമാക്കി.
നിലവിൽ സസ്പെൻഷനിലായ അധ്യാപകരെ ചോദ്യം ചെയ്യുന്നതിലൂടെ കൂടുതൽ വിവരങ്ങൾ പുറത്തുവരുമെന്നാണ് പോലീസ് പ്രതീക്ഷിക്കുന്നത്.
Story Summary:
Kannur City Police have booked two teachers, Dr. M.K. Ram and Dr. Sangeetha, for abetment of suicide and under the SC/ST Act in connection with the death of BDS student Nithin Raj. While the family alleges severe casteist slurs and mental harassment, the police are also investigating a potential link to a loan app harassment case involving a teacher’s phone number. The State Human Rights Commission has taken a suo motu case and demanded a report within a week.
