നെടുങ്കണ്ടം: പച്ചടി തോട്ടുവാക്കടവിൽ വീടിനോട് ചേർന്ന പറമ്പിൽ അമ്മയുടെയും മകന്റെയും മൃതദേഹങ്ങൾ കുഴിച്ചിട്ട നിലയിൽ കണ്ടെത്തിയ സംഭവത്തിൽ ഒളിവിലുള്ള ഇളയ മകൻ സജിയെ (43) കേന്ദ്രീകരിച്ച് അന്വേഷണം ശക്തമാക്കി (Nedumkandam Double Murder). ഇതിനിടെ സജിയുടെ പിതാവ് മാത്യു പാസ്റ്ററെ എട്ട് വർഷം മുൻപ് കാണാതായ സംഭവത്തിലും ഇപ്പോൾ ദുരൂഹത ഉയർന്നിരിക്കുകയാണ്.
മാത്യു പാസ്റ്ററുടെ തിരോധാനം
2018-ലാണ് മാത്യുവിനെ കാണാതാകുന്നത്. അന്ന് വീട്ടുകാർ പോലീസിൽ പരാതി നൽകിയിരുന്നെങ്കിലും കാര്യമായ സൂചനകളൊന്നും ലഭിച്ചിരുന്നില്ല. നിലവിലെ സാഹചര്യത്തിൽ, മാത്യുവിനെയും സജി കൊലപ്പെടുത്തി എവിടെയെങ്കിലും കുഴിച്ചുമൂടിയതാണോ എന്ന് പോലീസ് സംശയിക്കുന്നു. നാട്ടുകാരും ഇതേ ആരോപണവുമായി രംഗത്തെത്തിയിട്ടുണ്ട്.
ഇരട്ടക്കൊലപാതകം പുറംലോകമറിഞ്ഞത്
പൊന്നൂട്ടിയിൽ മേരി (70), മൂത്ത മകൻ റെജി (48) എന്നിവരുടേതെന്ന് കരുതുന്ന മൃതദേഹ അവശിഷ്ടങ്ങളാണ് തിങ്കളാഴ്ച കണ്ടെത്തിയത്. വീടിന് മുന്നിൽ ഒരടിയോളം മാത്രം താഴെയാണ് ഇവ കുഴിച്ചിട്ടിരുന്നത്. രണ്ടാഴ്ചയോളമായി ഇവരെ കാണാനില്ലാത്തതിനെ തുടർന്ന് മേരിയുടെ മകൾ സിനി നൽകിയ പരാതിയിലാണ് പോലീസ് തിരച്ചിൽ നടത്തിയത്.
അമ്മയെയും സഹോദരനെയും കുറിച്ച് നാട്ടുകാർ ചോദിച്ചപ്പോൾ ഇളയ മകൻ സജി നൽകിയ മറുപടികൾ സംശയമുണർത്തുന്നതായിരുന്നു. പോലീസ് എത്തുന്നതിന് മുൻപേ ഇയാൾ ഒളിവിൽ പോയി.
മൃതദേഹ അവശിഷ്ടങ്ങൾ പോസ്റ്റുമോർട്ടത്തിനും ഡിഎൻഎ പരിശോധനയ്ക്കുമായി ഇടുക്കി മെഡിക്കൽ കോളജിലേക്ക് മാറ്റി. ജില്ലാ പോലീസ് മേധാവിയുടെ കീഴിലുള്ള പ്രത്യേക സംഘമാണ് കേസ് അന്വേഷിക്കുന്നത്. സജി പിടിയിലാകുന്നതോടെ മാത്രമേ എട്ട് വർഷം മുൻപുള്ള തിരോധാനത്തിലുൾപ്പെടെ കൂടുതൽ വ്യക്തത ലഭിക്കുകയുള്ളൂ.
Story Summary: The discovery of two bodies buried in a house compound in Nedumkandam has raised suspicions about a third disappearance from eight years ago. Police suspect Saji, who is currently absconding, of murdering his mother Mary and brother Reji. Locals and authorities now wonder if Saji was also involved in the disappearance of his father, Mathew Pastor, in 2018. A special police team has been formed to track down Saji as forensic tests continue on the remains.
