മൂവാറ്റുപുഴ: ജോലി കഴിഞ്ഞ് അർദ്ധരാത്രിയിൽ വീട്ടിലേക്ക് മടങ്ങുകയായിരുന്ന യുവതിയെ ക്രൂരമായി ആക്രമിക്കാനും ലോറി പിന്തുടർന്ന് വധിക്കാനും ശ്രമിച്ച അഞ്ച് യുവാക്കൾ പോലീസ് പിടിയിൽ (Muvattupuzha woman missing midnight attack). ഈസ്റ്റ് മാറാടി പള്ളിക്കവല സ്വദേശി തട്ടാർകുന്നേൽ അജിത് (19), മീങ്കുന്നം പാറത്താഴത്ത് അദ്വൈത് (20), മാറാടി പഞ്ചായത്തുപടി ചാവാട്ട് ടോമി ഷാജി (19), മാറാടി ഹൈസ്കൂളിന് സമീപം ചാരപ്പുറത്ത് പുത്തൻപുരയിൽ അർജുൻ സനിൽ (20), മങ്ങമ്പ്ര തെങ്ങനാൽ അശ്വിൻ രഘു (20) എന്നിവരെയാണ് മൂവാറ്റുപുഴ പോലീസ് അതിവേഗം അറസ്റ്റ് ചെയ്തത്.
തിങ്കളാഴ്ച അർധരാത്രിയോടെ മൂവാറ്റുപുഴ ടൗണിലാണ് സിനിമ സ്റ്റൈൽ അക്രമസംഭവങ്ങൾ അരങ്ങേറിയത്. ജോലി കഴിഞ്ഞ ശേഷം വീട്ടിലേക്ക് മടങ്ങുന്നതിനായി കെ.എസ്.ആർ.ടി.സി ട്രാൻസ്പോർട്ട് ബസ് സ്റ്റാൻഡിലേക്ക് നടന്നുപോവുകയായിരുന്നു യുവതി. ജംഗ്ഷന് സമീപമെത്തിയപ്പോൾ ബൈക്കുകളിലെത്തിയ പ്രതികൾ യുവതിയെ തടഞ്ഞുനിർത്തുകയും മോശമായ രീതിയിൽ സംസാരിച്ച് ശല്യം ചെയ്യുകയുമായിരുന്നു. ഭയന്നുപോയ യുവതി ഇവരിൽ നിന്നും ഓടി രക്ഷപെടാൻ ശ്രമിച്ചതോടെ പ്രതികൾ തങ്ങളുടെ ബൈക്കുകൾ കൊണ്ട് യുവതിയെ ഇടിച്ചുതെറിപ്പിക്കാൻ ശ്രമിച്ചു.
ഈ സമയം റോഡിലൂടെ വന്ന ഒരു ടിപ്പർ ലോറിക്ക് കൈകാണിച്ച് യുവതി അതിൽ ഓടിക്കയറി രക്ഷപ്പെടുകയായിരുന്നു. എന്നാൽ പ്രതികൾ മാരകായുധങ്ങളുമായി ബൈക്കിൽ ടിപ്പർ ലോറിയെ പിന്തുടർന്നു. ഏകദേശം 15 കിലോമീറ്ററോളം ദൂരം ലോറിയെ വിടാതെ പിന്തുടർന്ന സംഘം, വഴിയിൽ വെച്ച് ലോറി തടഞ്ഞ് യുവതിയെ അപായപ്പെടുത്താൻ നിരന്തരം ശ്രമിച്ചുകൊണ്ടിരുന്നു. ഭയന്നുവിറച്ച യുവതി യാത്രയ്ക്കിടയിൽ തന്നെ എമർജൻസി നമ്പറിൽ മൂവാറ്റുപുഴ പോലീസിനെ വിളിച്ച് സഹായം അഭ്യർത്ഥിക്കുകയായിരുന്നു.
യുവതിയുടെ സന്ദേശം ലഭിച്ച ഉടൻ തന്നെ മൂവാറ്റുപുഴ പോലീസ് ഇൻസ്പെക്ടർ അനിൽ ജോർജ്ജിന്റെ നേതൃത്വത്തിലുള്ള വൻ പോലീസ് സംഘം സ്ഥലത്തേക്ക് തിരിച്ചു. റോഡിൽ പോലീസ് ജീപ്പിന്റെ സൈറൺ മുഴങ്ങുന്നത് കണ്ടതോടെ ലോറിയെ പിന്തുടർന്ന ഗുണ്ടാസംഘം ബൈക്കുകൾ തിരിച്ച് രക്ഷപ്പെടാൻ ശ്രമിച്ചെങ്കിലും പോലീസ് തന്ത്രപരമായി ഇവരെ വളഞ്ഞുപിടിക്കുകയായിരുന്നു.
പ്രതികളെ പിടികൂടിയ അന്വേഷണ സംഘത്തിൽ സബ് ഇൻസ്പെക്ടർമാരായ സി.ആർ. രഞ്ജുമോൾ, എ.എസ്.ഐമാരായ എസ്. ശ്രീനാഥ്, എം.എം. ഉബൈസ്, എം.വി. ദിലീപ് കുമാർ, സീനിയർ സിവിൽ പോലീസ് ഓഫീസർമാരായ എം.പി. രതീഷ്, ബോബി എബ്രഹാം, രഞ്ജിത് രാജൻ, ബിനിൽ എൽദോസ്, കെ.പി. നിസാർ, എം.ജി. ഷീജ എന്നിവരുമുണ്ടായിരുന്നു. അറസ്റ്റിലായ പ്രതികൾക്കെതിരെ സ്ത്രീത്വത്തെ അപമാനിക്കൽ, മാരകായുധങ്ങളുമായി വധശ്രമം ഉൾപ്പെടെയുള്ള ഗുരുതരമായ വകുപ്പുകൾ ചുമത്തി കോടതിയിൽ ഹാജരാക്കി റിമാൻഡ് ചെയ്തു.
Story Summary: Muvattupuzha police arrested five youths—Ajith, Adwaith, Tomy Shaji, Arjun Sanil, and Ashwin Raghu—for stalking and attempting to murder a woman returning from work at midnight. After the suspects harassed her and tried to hit her with a motorcycle, she escaped by hitching a ride on a passing tipper lorry. The youths chased the lorry with weapons for 15 km, but police intervened timely after receiving a distress call from the woman.
