റിപ്പോർട്ട്: അൻവർ ഷരിഫ്
മലപ്പുറം: പൊന്നാനി ലോക്സഭാ മണ്ഡലത്തിലെ എം.പി ഡോ. അബ്ദുസ്സമദ് സമദാനിയുടെ പ്രാദേശിക വികസന ഫണ്ട് വിനിയോഗം സംബന്ധിച്ച അവലോകന യോഗം ജില്ലാ കളക്ടർ ഡോ. വിനയ് ഗോയലിന്റെ അധ്യക്ഷതയിൽ ആസൂത്രണ സമിതി കോൺഫറൻസ് ഹാളിൽ ചേർന്നു (MP Fund Ponnan). എം.പി ഫണ്ട് ഉപയോഗിച്ചുള്ള വികസന പ്രവൃത്തികൾ സമയബന്ധിതമായി പൂർത്തിയാക്കണമെന്നും ഫണ്ട് വിനിയോഗം കൂടുതൽ കാര്യക്ഷമമാക്കണമെന്നും ജില്ലാ കളക്ടർ ഉദ്യോഗസ്ഥർക്ക് കർശന നിർദ്ദേശം നൽകി. പദ്ധതികളുടെ പുരോഗതി ഉദ്യോഗസ്ഥർ നിരന്തരമായി വിലയിരുത്തണമെന്നും യോഗത്തിൽ നിർദ്ദേശമുയർന്നു.
മലപ്പുറം, പാലക്കാട് ജില്ലകളിലായി 11.26 കോടി രൂപ ചെലവ് വരുന്ന 219 പ്രവൃത്തികളാണ് എം.പി നിർദ്ദേശിച്ചിട്ടുള്ളത്. ഇതിൽ മലപ്പുറം ജില്ലയിൽ 176 പ്രവൃത്തികളും പാലക്കാട് ജില്ലയിൽ 43 പ്രവൃത്തികളും ഉൾപ്പെടുന്നു. ഇതിനോടകം തന്നെ 5.96 കോടി രൂപയുടെ 157 പ്രവൃത്തികൾക്ക് ഭരണാനുമതി ലഭിച്ചിട്ടുണ്ട്. ഇ-സാക്ഷി പോർട്ടൽ വഴി 11.65 ലക്ഷം രൂപയുടെ ആറ് പ്രവൃത്തികൾ പൂർത്തീകരിച്ചതായും, 98.07 ലക്ഷം രൂപയുടെ 34 പ്രവൃത്തികൾ പൂർത്തിയായതായും പോർട്ടലിൽ രേഖപ്പെടുത്താനുള്ള നടപടികൾ നടക്കുന്നുണ്ടെന്നും യോഗത്തിൽ വ്യക്തമാക്കി.
പട്ടികജാതി/പട്ടികവർഗ്ഗ വികസനത്തിനായി മാറ്റി വെച്ചിട്ടുള്ള 3.75 കോടി രൂപയിൽ 1.68 കോടി രൂപയുടെ പ്രവൃത്തികൾ ഇതിനകം സമർപ്പിച്ചിട്ടുണ്ട്. ബാക്കിയുള്ള 2.06 കോടി രൂപയുടെ പദ്ധതികൾ എത്രയും വേഗത്തിൽ സമർപ്പിക്കാൻ യോഗം ബന്ധപ്പെട്ടവർക്ക് നിർദ്ദേശം നൽകി. കൂടാതെ 2026-27 വർഷത്തെ മെയിന്റനൻസ് വിഭാഗത്തിൽ 30 ലക്ഷം രൂപയുടെ പ്രവൃത്തികളും നിർദ്ദേശിച്ചിട്ടുണ്ട്. എം.പി ഡോ. അബ്ദുസ്സമദ് സമദാനി, പ്ലാനിങ് ഓഫീസർ ടി.വി. ഷാജു, ഫിനാൻസ് ഓഫീസർ ഇ. പ്രസീത തുടങ്ങിയവരും വിവിധ വകുപ്പ് ഉദ്യോഗസ്ഥരും യോഗത്തിൽ പങ്കെടുത്തു.
Summary: District Collector Dr. Vinay Goyal chaired a review meeting on the utilization of MP funds by Ponnani MP Dr. Abdussamad Samadani, urging officials to expedite pending development projects. Out of the 219 proposed works worth Rs 11.26 crore, many have received administrative sanction, and the district administration has mandated the swift submission of remaining projects, particularly those allocated for SC/ST development.
