റിപ്പോർട്ട് : അൻവർ ഷരീഫ്
മലപ്പുറം: സംസ്ഥാനവ്യാപകമായി എക്സൈസ് വകുപ്പ് നടത്തിവരുന്ന ‘ഓപ്പറേഷൻ തണ്ടർ’ സ്പെഷ്യൽ ഡ്രൈവിന്റെ ഭാഗമായി മലപ്പുറത്ത് വൻ മയക്കുമരുന്ന് വേട്ട (Malappuram MDMA seizure). മലപ്പുറം എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് എക്സൈസ് ഇൻസ്പെക്ടർ എ. ജയേഷും സംഘവും നടത്തിയ മിന്നൽ പരിശോധനയിൽ 31.58 ഗ്രാം എംഡിഎംഎയുമായി (MDMA) രണ്ട് പേർ പിടിയിലായി. തൃക്കലങ്ങോട് വില്ലേജിൽ കൊഴക്കളംചാൽ എല്ലുകമ്പനി ഭാഗത്ത് വെച്ചാണ് ഇവർ എക്സൈസിന്റെ വലയിലായത്.
ഏറനാട് താലൂക്കിൽ പയ്യനാട് വില്ലേജിൽ നെല്ലിക്കുത്ത് മുക്കം സ്വദേശി മുതിരപ്പറമ്പൻ വീട്ടിൽ ജാഫർ അലി (42), ഏറനാട് താലൂക്കിൽ തൃക്കലങ്ങോട് വില്ലേജിൽ കാരക്കുന്ന് 34 സ്വദേശി കളത്തിങ്ങൽ വീട്ടിൽ മുഹമ്മദ് മുസ്തഫ (36) എന്നിവരാണ് അറസ്റ്റിലായ പ്രതികൾ. ഇവരുടെ പക്കൽ നിന്നും കടത്താനുപയോഗിച്ച KL 58 7043 രജിസ്ട്രേഷൻ നമ്പറിലുള്ള മാരുതി സ്വിഫ്റ്റ് കാറിൽ നിന്നുമായാണ് എക്സൈസ് സംഘം മാരക മയക്കുമരുന്ന് കണ്ടെടുത്തത്. പിടികൂടിയ പ്രതികളെ വൈദ്യപരിശോധനയ്ക്ക് ശേഷം മഞ്ചേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി മുമ്പാകെ ഹാജരാക്കി റിമാൻഡ് ചെയ്തു. വരും ദിവസങ്ങളിൽ ജില്ലയിലെ മയക്കുമരുന്ന് മാഫിയകൾക്കെതിരെ ഓപ്പറേഷൻ തണ്ടർ പരിശോധനകൾ കൂടുതൽ ശക്തമായി തുടരുമെന്ന് എക്സൈസ് ഇൻസ്പെക്ടർ അറിയിച്ചു.
പ്രത്യേക എക്സൈസ് സംഘത്തിൽ ഇൻസ്പെക്ടർ എ. ജയേഷിനൊപ്പം അസിസ്റ്റന്റ് എക്സൈസ് ഇൻസ്പെക്ടർ (ഗ്രേഡ്) ആസിഫ് ഇഖ്ബാൽ കെ., പ്രിവന്റീവ് ഓഫീസർ (ഗ്രേഡ്) പ്രഭാകരൻ പള്ളത്ത്, സിവിൽ എക്സൈസ് ഓഫീസർമാരായ സബീർ കെ., അനീസ് ബാബു, സിവിൽ എക്സൈസ് ഓഫീസർ ഡ്രൈവർ ശ്രീജിത്ത് പി. എന്നിവരും പങ്കെടുത്തു.
Story Summary:
Two men, Jafar Ali (42) and Muhammad Mustafa (36), were arrested with 31.58 grams of MDMA in Malappuram by the Excise Enforcement and Anti-Narcotic Special Squad under the ‘Operation Thunder’ drive. The contraband and their Maruti Swift car were seized near Kozhakalamchal, and the accused were remanded by the Manjeri court.
