കോഴിക്കോട്: ജില്ലയിൽ കടുത്ത വേനൽച്ചൂട് തുടരുന്നതിനിടെ കൊടിയത്തൂർ പഞ്ചായത്തിൽ യുവാവിന് സൂര്യാതപമേറ്റു (Kozhikode Sunstroke Case). പന്നിക്കോട് കാരാളിപ്പറമ്പ് സ്വദേശി ആര്യംപറമ്പത്ത് അബ്ദുൽ ജലീലിനാണ് പൊള്ളലേറ്റത്. ഇദ്ദേഹത്തിന്റെ രണ്ട് കൈകളിലും കാലിലുമാണ് സൂര്യതാപമേറ്റ് ചുവന്നു തടിക്കുകയും പൊള്ളലുണ്ടാവുകയും ചെയ്തത്.
കഴിഞ്ഞ ദിവസം ഉച്ചയ്ക്ക് 12.30-ഓടെ വീട്ടിൽ നിന്നും ചെറുവാടി ഭാഗത്തേക്ക് ബൈക്കിൽ പോകുകയായിരുന്നു ജലീൽ. ചെറുവാടി വയലിന്റെ ഭാഗത്തെത്തിയപ്പോഴാണ് അസഹനീയമായ ചൂട് അനുഭവപ്പെടുകയും ശരീരത്തിൽ പൊള്ളലേൽക്കുകയും ചെയ്തത്. തുടർന്ന് ജലീൽ ചെറുവാടി ഹെൽത്ത് സെന്ററിൽ ചികിത്സ തേടി.
സംസ്ഥാനത്ത് താപനില ക്രമാതീതമായി ഉയരുന്ന സാഹചര്യത്തിൽ ഉച്ചസമയങ്ങളിൽ നേരിട്ട് വെയിലേൽക്കുന്നത് ഒഴിവാക്കണമെന്ന് ആരോഗ്യവകുപ്പ് നിർദ്ദേശം നൽകിയിട്ടുണ്ട്. കോഴിക്കോട് ജില്ലയുടെ വിവിധ ഭാഗങ്ങളിൽ വരും ദിവസങ്ങളിലും കടുത്ത ചൂട് തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
Summary: A youth named Abdul Jaleel from Pannikkode, Kozhikode, suffered a sunstroke while traveling by bike on Friday afternoon. He sustained burns on both hands and legs due to the intense heat near Cheruvadi. He sought medical treatment at the Cheruvadi Health Centre. Health officials have advised the public to avoid direct sunlight during peak hours as temperatures continue to rise across the state.
