കോഴിക്കോട്: കെഎസ്ആർടിസി ഓർഡിനറി ബസുകളിലെ ‘പ്രിയദർശിനി’ സൗജന്യ യാത്രാ പദ്ധതിയും ഇന്ധനച്ചെലവിലെ വർധനയും ചേർന്ന് സ്വകാര്യ ബസ് മേഖലയെ ഗുരുതര സാമ്പത്തിക പ്രതിസന്ധിയിലേക്ക് തള്ളിയതായി ബസ് ഉടമകൾ (Kozhikode private buses). നിലവിലെ സാഹചര്യത്തിൽ നഷ്ടം സഹിച്ച് സർവീസ് തുടരുക അസാധ്യമാണെന്നും അതിനാൽ കോഴിക്കോട് ജില്ലയിലെ സ്വകാര്യ ബസുകൾ ജൂലൈ മുതൽ സർവീസ് അവസാനിപ്പിക്കുന്നതിനെക്കുറിച്ച് ആലോചിക്കുന്നതായും ബസ് ഓപ്പറേറ്റേഴ്സ് ഓർഗനൈസേഷൻ സംസ്ഥാന സെക്രട്ടറി കെ. രാധാകൃഷ്ണൻ അറിയിച്ചു.
സംഘടനയുടെ വിലയിരുത്തലനുസരിച്ച് ജില്ലയിൽ സർവീസ് നടത്തുന്ന 1,500-ലധികം സ്വകാര്യ ബസുകളാണ് പ്രതിസന്ധിയുടെ ആഘാതം നേരിടുന്നത്. യാത്രക്കാരുടെ എണ്ണത്തിൽ ഉണ്ടായ ഇടിവും പ്രവർത്തനച്ചെലവിലെ വർധനയും മൂലം ദിവസേന വലിയ സാമ്പത്തിക നഷ്ടമാണ് ബസ് ഉടമകൾക്ക് സംഭവിക്കുന്നതെന്ന് അവർ പറയുന്നു.
കോഴിക്കോട് പുതിയ ബസ് സ്റ്റാൻഡിൽ നിന്ന് വയനാട്ടിലേക്കുള്ള സർവീസുകൾക്ക് പുറമെ കോഴിക്കോട്–കുറ്റ്യാടി, കുന്നമംഗലം, താമരശ്ശേരി, മുക്കം, മാവൂർ, വടകര, കൊയിലാണ്ടി തുടങ്ങി പ്രധാന റൂട്ടുകളിലാണ് നഷ്ടം കൂടുതൽ അനുഭവപ്പെടുന്നതെന്നാണ് സംഘടനയുടെ വിശദീകരണം.
സ്വകാര്യ ബസുകൾ സർവീസ് അവസാനിപ്പിക്കേണ്ട സാഹചര്യം ഉണ്ടായാൽ ആയിരക്കണക്കിന് ഡ്രൈവർമാർക്കും കണ്ടക്ടർമാർക്കും മറ്റ് ജീവനക്കാർക്കും തൊഴിൽ നഷ്ടമുണ്ടാകുമെന്നും അതിന്റെ ആഘാതം നിരവധി കുടുംബങ്ങളെ ബാധിക്കുമെന്നും ബസ് ഉടമകൾ മുന്നറിയിപ്പ് നൽകുന്നു.
ഗതാഗത മേഖലയിലെ നിലവിലെ പ്രതിസന്ധി മറികടക്കാൻ സർക്കാർ അടിയന്തര ഇടപെടൽ നടത്തണമെന്നും സൗജന്യ യാത്രാ പദ്ധതിയുടെ പശ്ചാത്തലത്തിൽ സ്വകാര്യ ബസ് മേഖലയ്ക്ക് പ്രത്യേക സാമ്പത്തിക സഹായം നൽകണമെന്നും സംഘടന ആവശ്യപ്പെട്ടു. ആവശ്യമായ പിന്തുണ ലഭിക്കാത്ത പക്ഷം സർവീസ് തുടരുന്നത് ദുഷ്കരമാകുമെന്ന് ബസ് ഓപ്പറേറ്റേഴ്സ് ഓർഗനൈസേഷൻ വ്യക്തമാക്കി.
Story Summary:
Private bus operators in Kozhikode say the KSRTC free travel scheme and rising diesel prices have pushed the sector into a severe financial crisis. More than 1,500 private buses may stop services from July if the government does not provide immediate support.
