കോട്ടയം: കോട്ടയം നഗരത്തിലെ പ്രധാന പ്രവേശന കവാടങ്ങളിലൊന്നായ കോടിമത പാലത്തിന്റെ അപ്രോച്ച് റോഡ് അടിയന്തര നവീകരണ പ്രവൃത്തികൾക്കായി അടയ്ക്കുന്നു (Kottayam Traffic Restriction). നാളെ (ജൂലൈ 2) രാവിലെ 10:00 മണി മുതൽ കോട്ടയം നഗരത്തിൽ കടുത്ത ഗതാഗത നിയന്ത്രണങ്ങൾ ഏർപ്പെടുത്തിക്കൊണ്ട് ജില്ലാ കളക്ടർ ഉത്തരവിട്ടു. പാലത്തിലൂടെയുള്ള ഗതാഗതം പൂർണ്ണമായി നിരോധിച്ച പശ്ചാത്തലത്തിൽ, നഗരത്തിലേക്കുള്ള പ്രവേശന കവാടങ്ങളിൽ വെച്ചുതന്നെ വാഹനങ്ങൾ വഴിതിരിച്ചുവിടും. റോഡ് നവീകരണവുമായി ബന്ധപ്പെട്ട നിയന്ത്രണങ്ങൾ ഒരാഴ്ചയോളം നീളുമെന്നതിനാൽ യാത്രക്കാർ യാത്രാസമയം മുൻകൂട്ടി കണ്ട് ഇറങ്ങണമെന്ന് കളക്ടർ പ്രത്യേക നിർദ്ദേശം നൽകി.
വിവിധ ഭാഗങ്ങളിൽ നിന്നും എത്തുന്ന വാഹനങ്ങൾക്കായി പോലീസ് ഏർപ്പെടുത്തിയിട്ടുള്ള ബദൽ റൂട്ടുകൾ താഴെ നൽകുന്നു:
ചരക്ക് – സ്വകാര്യ വാഹനങ്ങളും അന്തർ സംസ്ഥാന ബസുകളും:
-
തിരുവനന്തപുരം ഭാഗത്തുനിന്ന് എറണാകുളത്തേക്ക്: പോകേണ്ട ചരക്ക്-സ്വകാര്യ വാഹനങ്ങൾ ളായിക്കാട് ബൈപ്പാസ് ജംഗ്ഷനിൽ നിന്ന് തിരിഞ്ഞ് തെങ്ങണ, പുതുപ്പള്ളി, മണർകാട് ബൈപ്പാസ് വഴി ഏറ്റുമാനൂർ പട്ടിത്താനത്ത് പ്രവേശിച്ച് യാത്ര തുടരണം.
-
എറണാകുളത്തുനിന്ന് തിരികെ തെക്കോട്ട്: പോകുന്ന വാഹനങ്ങൾ പട്ടിത്താനം ജംഗ്ഷനിൽ നിന്ന് തിരിഞ്ഞ് മണർകാട്, പുതുപ്പള്ളി വഴി തെങ്ങണയിലെത്തി വേണം യാത്ര തുടരാൻ.
-
അന്തർ സംസ്ഥാന ബസുകൾ: കോട്ടയം ടൗണിൽ പ്രവേശിക്കാതെ മണർകാട്, ഏറ്റുമാനൂർ വഴി സർവീസ് നടത്തണം.
കെഎസ്ആർടിസി, സ്വകാര്യ ബസുകൾ, മറ്റ് വാഹനങ്ങൾ:
-
ചങ്ങനാശ്ശേരിയിൽ നിന്ന് ടൗൺ, മെഡിക്കൽ കോളേജ്, ഏറ്റുമാനൂർ ഭാഗങ്ങളിലേക്ക്: പോകേണ്ട കെഎസ്ആർടിസി, സ്വകാര്യ ബസുകൾ സിമന്റ് കവലയിൽ നിന്ന് തിരിഞ്ഞ് പാറേച്ചാൽ ബൈപ്പാസ്, തിരുവാതുക്കൽ, അറുത്തൂട്ടി വഴി ചാലുകുന്ന് ജംഗ്ഷനിലെത്തണം.
-
ടൗണിൽ നിന്ന് ചങ്ങനാശ്ശേരി ഭാഗത്തേക്ക്: പോകേണ്ട ബസുകൾ കഞ്ഞിക്കുഴിയിൽ എത്തി കൊല്ലാട്, കടുവാക്കുളം വഴി പോകണം.
-
പുതുപ്പള്ളി, മണർകാട് ഭാഗങ്ങളിലേക്ക്: പോകേണ്ട മറ്റ് സ്വകാര്യ വാഹനങ്ങൾ മണിപ്പുഴ ജംഗ്ഷനിൽ നിന്ന് തിരിഞ്ഞ് കടുവാക്കുളം, കൊല്ലാട് വഴി തിരിഞ്ഞുപോകണം.
ആംബുലൻസുകൾക്കും അടിയന്തര വാഹനങ്ങൾക്കും പ്രത്യേക റൂട്ട്:
-
ചങ്ങനാശ്ശേരി ഭാഗത്തുനിന്ന് കോട്ടയം ജില്ലാ ആശുപത്രിയിലേക്കും കോട്ടയം മെഡിക്കൽ കോളേജിലേക്കും രോഗികളുമായി പോകുന്ന ആംബുലൻസുകളും മറ്റ് എമർജൻസി വാഹനങ്ങളും മണിപ്പുഴ ജംഗ്ഷനിൽ നിന്ന് വലത്തോട്ട് തിരിഞ്ഞ് ‘ഈരയിൽ കടവ് ബൈപ്പാസ്’ വഴി മനോരമ ജംഗ്ഷനിലെത്തി വേണം നഗരത്തിലേക്ക് കടക്കാൻ.
റോഡ് നിർമ്മാണം വേഗത്തിൽ പൂർത്തിയാക്കി ഗതാഗതം പുനഃസ്ഥാപിക്കുമെന്നും ഡ്രൈവർമാർ ട്രാഫിക് പോലീസിന്റെ നിർദ്ദേശങ്ങളോട് പൂർണ്ണമായി സഹകരിക്കണമെന്നും ജില്ലാ ഭരണകൂടം അറിയിച്ചു.
Story Summary: Strict traffic restrictions will be imposed in Kottayam town from July 2 (10:00 AM) for a week due to the renovation of the Kodimatha bridge approach road. District Collector has issued an order diverting heavy vehicles, buses, and private cars through alternative routes like Manarcad, Puthuppally, and Eerayil Kadavu bypass.
