കൊച്ചി: സംസ്ഥാനത്ത് സ്വർണ്ണവില വീണ്ടും റെക്കോർഡ് നിലവാരത്തിലേക്ക് അടുക്കുന്നു. ഇന്ന് ഒറ്റയടിക്ക് 1400 രൂപയുടെ വൻ വർധനവാണ് രേഖപ്പെടുത്തിയത്. ഇതോടെ ഒരു പവൻ സ്വർണ്ണത്തിന്റെ പുതിയ വില 93,160 രൂപയായി.(Kerala Gold price hiked, know about today's rate)
പവന് 93,160 രൂപ എന്ന നിലയിലും, ഗ്രാമിന് 175 രൂപ കൂടി 11,645 രൂപ എന്ന നിലയിലുമാണ് വിപണിയിൽ വ്യാപാരം പുരോഗമിക്കുന്നത്. ഈ മാസം സ്വർണ്ണവിലയിൽ വലിയ ചാഞ്ചാട്ടമാണ് ദൃശ്യമായത്.
മാസത്തിൻ്റെ തുടക്കത്തിൽ ഒരു പവൻ സ്വർണ്ണത്തിന് 90,200 രൂപയായിരുന്നു വില. ഈ മാസം അഞ്ചിന് വില കുറഞ്ഞ് 89,080 രൂപയിൽ എത്തി, ഇതാണ് ഈ മാസത്തെ ഏറ്റവും താഴ്ന്ന നിലവാരം. പിന്നീട് പടിപടിയായി വില ഉയരുകയും, ഈ മാസം 13-ന് 94,320 രൂപയെന്ന ഏറ്റവും ഉയർന്ന നിലവാരത്തിൽ എത്തുകയും ചെയ്തിരുന്നു.
ഈ ഉയർന്ന നിലവാരത്തിന് ശേഷം വില കുറയുന്ന പ്രവണതയാണ് കണ്ടിരുന്നതെങ്കിലും, ഇന്നത്തെ കുത്തനെയുള്ള വർധനവ് നിക്ഷേപകരെയും ഉപഭോക്താക്കളെയും ഒരുപോലെ ആശങ്കയിലാഴ്ത്തുകയാണ്.