കണ്ണൂർ: പയ്യന്നൂരിൽ സ്റ്റിച്ചിടുന്നതിനായി അനസ്തേഷ്യ നൽകിയതിന് പിന്നാലെ ഒന്നരവയസുകാരൻ മരണപ്പെട്ട സംഭവത്തിൽ വിശദീകരണവുമായി കണ്ണൂർ ബേബി മെമ്മോറിയൽ ആശുപത്രി അധികൃതർ. ദേവാൻഷിന്റെ മരണത്തിൽ അതിയായ ദുഃഖം രേഖപ്പെടുത്തുന്നതായും കുഞ്ഞിന് വൈദ്യസഹായം നൽകിയതിൽ യാതൊരുവിധ ചികിൽസാ പിഴവും സംഭവിച്ചിട്ടില്ലെന്നും ആശുപത്രി മാനേജ്മെന്റ് അറിയിച്ചു.(Kannur toddler death, BMH hospital denies negligence)
എല്ലാവിധ മാനദണ്ഡങ്ങളും പാലിച്ചാണ് ചികിത്സ നൽകിയത്. ലഭ്യമായ എല്ലാ ആധുനിക സജ്ജീകരണങ്ങളും കുഞ്ഞിനെ രക്ഷിക്കാൻ ഉപയോഗിച്ചതായും സംഭവത്തിൽ നിയമാനുസൃതമായ എല്ലാ അന്വേഷണങ്ങൾക്കും പൂർണ്ണ പിന്തുണ നൽകുമെന്നും ആശുപത്രി അധികൃതർ വ്യക്തമാക്കി.
പയ്യന്നൂർ സ്വദേശികളായ സൂരജ്-വിജിഷ ദമ്പതികളുടെ മകൻ ദേവാൻഷ് വെള്ളിയാഴ്ച രാത്രിയാണ് കണ്ണൂർ ബി.എം.എച്ച് ആശുപത്രിയിൽ വെച്ച് മരിച്ചത്. കഴിഞ്ഞ ഞായറാഴ്ച കളിക്കുന്നതിനിടെ വീണ് മുഖത്ത് പരിക്കേറ്റതിനെ തുടർന്നാണ് കുഞ്ഞിനെ ആദ്യം പയ്യന്നൂർ ബി.എം.എച്ച് ആശുപത്രിയിൽ പ്രവേശിപ്പിച്ചത്. ഇവിടെ വെച്ച് മുറിവ് തുന്നിക്കെട്ടാൻ അനസ്തേഷ്യ നൽകിയതിന് പിന്നാലെ കുഞ്ഞിന്റെ ആരോഗ്യനില ഗുരുതരമാവുകയായിരുന്നു. തുടർന്ന് വിദഗ്ധ ചികിത്സയ്ക്കായി കണ്ണൂരിലെ ബി.എം.എച്ചിലേക്ക് മാറ്റിയെങ്കിലും ജീവൻ രക്ഷിക്കാനായില്ല.
അതേസമയം, സംഭവത്തിൽ ഡോക്ടറുടെ ഭാഗത്തുനിന്ന് ഗുരുതരമായ ചികിൽസാ പിഴവുണ്ടായെന്ന് ആരോപിച്ച് കുടുംബം പോലീസിൽ പരാതി നൽകി. ഇതിന്റെ അടിസ്ഥാനത്തിൽ പയ്യന്നൂർ ബി.എം.എച്ച് ആശുപത്രിയിലെ ഡോക്ടർക്കെതിരെ പോലീസ് കേസെടുത്തിട്ടുണ്ട്. കുട്ടിയുടെ മൃതദേഹം ഇന്ന് പരിയാരം മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടം നടത്തും.
Story Summary
Baby Memorial Hospital (BMH) authorities denied medical negligence allegations following the tragic death of a one-and-a-half-year-old boy, Devansh, after he was administered anesthesia for stitches. While the family alleged treatment error and the police registered a case against Doctor, the hospital maintained that all medical standards were followed.
