കണ്ണൂർ: നിയമസഭാ തെരഞ്ഞെടുപ്പിൽ മത്സരിക്കാനുള്ള നീക്കങ്ങൾക്കൊടുവിൽ ഹൈക്കമാൻഡ് തീരുമാനം അംഗീകരിച്ച് കെ. സുധാകരൻ എംപി കണ്ണൂരിൽ തിരിച്ചെത്തി (K Sudhakaran Returns to Kannur). ഡൽഹിയിൽ നിന്നും പുലർച്ചെ കണ്ണൂർ വിമാനത്താവളത്തിലെത്തിയ അദ്ദേഹത്തിന് പ്രവർത്തകർ ആവേശോജ്ജ്വലമായ സ്വീകരണമാണ് നൽകിയത്. കണ്ണൂരിലെ യുഡിഎഫ് സ്ഥാനാർത്ഥി ടി.ഒ. മോഹനൻ ഇന്ന് സുധാകരനെ വീട്ടിലെത്തി കാണുമെന്നാണ് റിപ്പോർട്ടുകൾ. സുധാകരന്റെ അനുഗ്രഹത്തോടെ പ്രചാരണ രംഗത്ത് സജീവമാകാനാണ് മോഹനന്റെ തീരുമാനം.
എംപിമാർ നിയമസഭയിലേക്ക് മത്സരിക്കേണ്ടതില്ലെന്ന ഹൈക്കമാൻഡിന്റെ കർശന നിലപാടിന് മുന്നിൽ സുധാകരന് വഴങ്ങേണ്ടി വരികയായിരുന്നു. അവസാന നിമിഷം വരെ സീറ്റിനായി സമ്മർദ്ദം ചെലുത്തിയെങ്കിലും പാർട്ടി തീരുമാനം അംഗീകരിക്കുന്നുവെന്ന് അദ്ദേഹം ഡൽഹിയിൽ വ്യക്തമാക്കിയിരുന്നു. താൻ പ്രസ്ഥാനത്തിന് വിധേയനാണെന്നും പാർട്ടി മാറില്ലെന്നും അദ്ദേഹം മാധ്യമങ്ങളോട് പ്രതികരിച്ചു. സുധാകരനൊപ്പം സീറ്റ് പ്രതീക്ഷിച്ചിരുന്ന അടൂർ പ്രകാശിനും ഹൈക്കമാൻഡ് നിലപാടിൽ തിരിച്ചടി നേരിട്ടു.
കണ്ണൂരിൽ യുഡിഎഫ് സ്ഥാനാർത്ഥിയെ പൂർണ്ണമായി പിന്തുണച്ച് മുന്നോട്ട് പോകാനാണ് സുധാകരന്റെ നീക്കം. വരും ദിവസങ്ങളിൽ ജില്ലയിലെ യുഡിഎഫ് പ്രചാരണ പ്രവർത്തനങ്ങളിൽ അദ്ദേഹം സജീവമാകുന്നത് പ്രവർത്തകർക്ക് വലിയ ആവേശം നൽകുമെന്നാണ് വിലയിരുത്തപ്പെടുന്നത്. രണ്ടാം ഘട്ട സ്ഥാനാർത്ഥി പട്ടിക പുറത്തുവന്ന സാഹചര്യത്തിൽ സുധാകരന്റെ ഓരോ നീക്കവും രാഷ്ട്രീയ കേരളം അതീവ താൽപ്പര്യത്തോടെയാണ് ഉറ്റുനോക്കുന്നത്.
