തിരുവനന്തപുരം: കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കം മുറുകുന്നതിനിടെ വി.ഡി. സതീശനെതിരെ പരസ്യ നിലപാടുമായി കെപിസിസി പ്രസിഡന്റ് കെ. സുധാകരൻ (K Sudhakaran on KC Venugopal Support). കോൺഗ്രസിൽ ഒരു സതീശൻ മാത്രമല്ല, സമർത്ഥരായ ഒരുപാട് സതീശന്മാരുണ്ടെന്ന് അദ്ദേഹം എഎൻഐയ്ക്ക് നൽകിയ പ്രതികരണത്തിൽ പറഞ്ഞു. മുഖ്യമന്ത്രിയാകാൻ ആഗ്രഹിക്കുന്നവർ എംഎൽഎമാരുടെ പിന്തുണ ഉറപ്പാക്കണമെന്നും തന്നെ പിന്തുണയ്ക്കുന്നവരെ താനും പിന്തുണയ്ക്കുമെന്നും അദ്ദേഹം വ്യക്തമാക്കി.
കേരളത്തിലെ രാഷ്ട്രീയ സാഹചര്യം എഐസിസി നിരീക്ഷകരെ ബോധ്യപ്പെടുത്തിയിട്ടുണ്ട്. മുഖ്യമന്ത്രിയെ തിരഞ്ഞെടുക്കാൻ പ്രത്യേക ഫോർമുല താൻ നിരീക്ഷകർക്ക് മുന്നിൽ വെച്ചിട്ടുണ്ടെന്നും എന്നാൽ അത് രഹസ്യമാണെന്നും സുധാകരൻ പറഞ്ഞു. എംഎൽഎമാരുടെ പിന്തുണയില്ലാതെ പാർട്ടിക്ക് മുന്നോട്ട് പോകാനാകില്ല. അതിനാൽ എംഎൽഎമാരുടെ ഭൂരിപക്ഷം മുഖ്യമന്ത്രിയെ തീരുമാനിക്കുന്നതിൽ പ്രധാനമാണ്. എന്നാൽ പ്രവർത്തകരുടെ വികാരം കൂടി പരിഗണിച്ച് വേണം അന്തിമ തീരുമാനമെടുക്കാനെന്നും അദ്ദേഹം കൂട്ടിച്ചേർത്തു.
അഞ്ചുവർഷം മുന്നണിയെ നയിച്ച പ്രതിപക്ഷ നേതാവ് എന്ന നിലയിൽ സതീശന് അവസരം നൽകേണ്ടതില്ലേ എന്ന ചോദ്യത്തിന്, പ്രതിപക്ഷ നേതാവിന് അദ്ദേഹത്തിന്റേതായ അഭിപ്രായമുണ്ടാകുമെന്നും അത് അദ്ദേഹം പറയട്ടെ എന്നുമായിരുന്നു സുധാകരന്റെ മറുപടി. സതീശന്റെ അവകാശവാദങ്ങളെ തള്ളുന്ന തരത്തിലുള്ള സുധാകരന്റെ ഈ വാക്കുകൾ കെ.സി. വേണുഗോപാലിന് അനുകൂലമായ നീക്കമായാണ് രാഷ്ട്രീയ കേന്ദ്രങ്ങൾ വിലയിരുത്തുന്നത്. പേര് വെളിപ്പെടുത്തിയില്ലെങ്കിലും തന്നെ പിന്തുണയ്ക്കുന്ന നേതാവിനായി താൻ ഉറച്ചുനിൽക്കുമെന്ന് സുധാകരൻ വ്യക്തമാക്കിയതോടെ ഗ്രൂപ്പ് പോര് പുതിയ തലത്തിലെത്തി.
Summary: KPCC President K. Sudhakaran has openly criticized V.D. Satheesan amidst the ongoing Kerala CM race. Sudhakaran stated that Congress has many capable leaders and that he would support those who support him. He emphasized the importance of MLA support and public sentiment in choosing the Chief Minister, while hinting at a secret formula he proposed to AICC observers.
