കൊച്ചി: വടക്കേ അമേരിക്കയിൽ ഫുട്ബോൾ ലോകകപ്പ് അരങ്ങേറുന്ന യു.എസ്, കാനഡ, മെക്സിക്കോ എന്നീ രാജ്യങ്ങളിലെ പ്രധാന നഗരങ്ങളെയും സ്റ്റേഡിയങ്ങളെയും ബന്ധിപ്പിച്ച് അത്യാധുനിക ചാർട്ടർ വിമാന സർവീസുകളുമായി മലയാളി വ്യവസായിയുടെ വ്യോമയാന കമ്പനി (Halo Airways World Cup charter flights). 2012-ൽ കൊച്ചി ആസ്ഥാനമായി എറണാകുളം പിറവം സ്വദേശി ഷോബി ടി. പോൾ തുടക്കമിട്ട പ്രമുഖ എയർ ചാർട്ടർ കമ്പനിയായ ‘ഹാലോ എയർവേയാസ്’ (Halo Airways) ആണ് ഈ ചരിത്രനേട്ടം സ്വന്തമാക്കിയത്. നിലവിൽ ബെംഗളൂരു, ഡൽഹി എന്നിവടങ്ങൾ കേന്ദ്രീകരിച്ച് പ്രവർത്തിക്കുന്ന കമ്പനി ഇതാദ്യമായാണ് ഏഴാംകടലിനക്കരെ വടക്കേ അമേരിക്കൻ മണ്ണിലേക്ക് തങ്ങളുടെ സർവീസുകൾ വ്യാപിപ്പിക്കുന്നത്.
യൂറോപ്പ്, ഫാർ ഈസ്റ്റ്, മിഡിൽ ഈസ്റ്റ് രാജ്യങ്ങളിലേക്ക് കമ്പനി സ്ഥിരമായി സർവീസുകൾ നടത്താറുണ്ടെങ്കിലും വടക്കേ അമേരിക്കൻ മേഖലയിൽ ഇതാദ്യമായാണ് തങ്ങൾ സേവനമെത്തിക്കുന്നതെന്ന് കമ്പനി മാനേജിങ് ഡയറക്ടർ ഷോബി ടി. പോൾ ന്യൂയോർക്കിൽ നിന്ന് അറിയിച്ചു. ലോകകപ്പ് ഫുട്ബോൾ മത്സരങ്ങൾ സുഖകരമായി കാണാനെത്തുന്ന പ്രമുഖർക്കായി വിപുലമായ സജ്ജീകരണങ്ങളുള്ള നാല് ആഡംബര വിമാനങ്ങളാണ് കമ്പനി ഇവിടെ വിന്യസിച്ചിരിക്കുന്നത്. ഈ പ്രത്യേക അന്താരാഷ്ട്ര സർവീസ് സുഗമമായി ഓപ്പറേറ്റ് ചെയ്യുന്നതിനായി യു.എസിലും കാനഡയിലുമുള്ള പ്രമുഖ പ്രാദേശിക ഏവിയേഷൻ കമ്പനികളുമായി ഹാലോ പങ്കാളിത്തം ഉറപ്പിച്ചു കഴിഞ്ഞു.
മയാമിയിലെ നോർത്ത് പെറി വിമാനത്താവളം ആസ്ഥാനമായി പ്രവർത്തിക്കുന്ന പ്രശസ്തമായ ‘റോയൽറ്റി ഏവിയേഷൻ ഗ്രൂപ്പു’മായുള്ള (Royalty Aviation Group) സഹകരണമാണ് ഇതിൽ ഏറ്റവും പ്രധാനപ്പെട്ടത്. മറ്റൊരു കൊച്ചി സ്വദേശിയായ ക്യാപ്റ്റൻ വിബിൻ വിൻസെന്റാണ് റോയൽറ്റി ഏവിയേഷന്റെ മുഖ്യ പ്രൊമോട്ടർ എന്ന പ്രത്യേകതയുമുണ്ട്. സർവീസുകൾക്ക് ആവശ്യമായ അന്താരാഷ്ട്ര അനുമതികൾ, വിമാനത്താവളങ്ങളിലെ ഗ്രൗണ്ട് ഹാൻഡ്ലിങ്, ലോജിസ്റ്റിക്കൽ അസിസ്റ്റൻസ് എന്നിവയാണ് ഈ പ്രാദേശിക പങ്കാളികൾ ഹാലോ എയർവേയാസിന് ലഭ്യമാക്കുന്നത്.
ലോകകപ്പ് സ്പെഷ്യൽ സർവീസുകൾക്കായി 7 സീറ്റുകളുള്ള അത്യാധുനിക ‘സെസ്സ്ന സൈറ്റേഷൻ സിജെ2’, 8 സീറ്റുകളുള്ള ‘എംബ്രേയർ ഫെനോം 300’, 9 സീറ്റുകളുള്ള ‘സെസ്സ്ന സൈറ്റേഷൻ പത്ത്’, പ്രീമിയം ലോങ്-റേഞ്ച് അന്താരാഷ്ട്ര സർവീസുകൾക്കായി 13 സീറ്റുകളുള്ള അത്യാധുനിക ‘ഗൾഫ്സ്ട്രീം ജി550’ (Gulfstream G550) എന്നീ അത്യാധുനിക എയർക്രാഫ്റ്റുകളാണ് കമ്പനി നിലവിൽ സജ്ജമാക്കിയിരിക്കുന്നത്.
യു.എസിലെ പ്രമുഖ നഗരങ്ങളായ ന്യൂയോർക്ക് (JFK), മയാമി, ലോസ് ആഞ്ചെലസ്, സിയാറ്റിൽ-ടകോമ, ബോസ്റ്റൺ ലോഗൻ, ഡള്ളസ്-ഫോർട്ട് വർത്ത്, അറ്റ്ലാന്റ ഹാർട്സ്ഫീൽഡ് ജാക്സൺ എന്നീ പ്രമുഖ വിമാനത്താവളങ്ങളെയും, കാനഡയിലെ ടൊറന്റോ, വാൻകൂവർ എന്നിവയും, മെക്സിക്കോയിലെ മെക്സിക്കോ സിറ്റി അന്താരാഷ്ട്ര വിമാനത്താവളത്തെയും പരസ്പരം കൃത്യമായി ബന്ധിപ്പിച്ചാണ് ഹാലോ എയർവേയാസ് സർവീസ് നടത്തുന്നത്.
ഇന്ത്യയിലെയും വിദേശത്തെയും നിരവധി പ്രമുഖ രാഷ്ട്രീയ-കായിക-ബിസിനസ്സ് വ്യക്തിത്വങ്ങൾക്ക് തങ്ങൾ വിജയകരമായി സേവനം നൽകിയിട്ടുണ്ടെന്ന് ഷോബി ടി. പോൾ വ്യക്തമാക്കി. കേന്ദ്രമന്ത്രിമാരായ എസ്. ജയശങ്കർ, നിർമ്മല സീതാരാമൻ, പീയൂഷ് ഗോയൽ, പ്രതിപക്ഷ നേതാവ് രാഹുൽ ഗാന്ധി, കർണാടക ഉപമുഖ്യമന്ത്രി ഡി.കെ. ശിവകുമാർ, മുൻ കേരള മുഖ്യമന്ത്രി പിണറായി വിജയൻ, ക്രിക്കറ്റ് ഇതിഹാസങ്ങളായ വിരാട് കോഹ്ലി, മലയാളി താരം സഞ്ജു സാംസൺ, ടാലി ചെയർമാൻ ഭാരത് ഗോയങ്ക, ഇൻഫോസിസ് ചെയർമാൻ നന്ദൻ നിലേകനി, ബയോക്കോൺ ചെയർപേഴ്സൺ കിരൺ മജുംദാർ, മുരുഗപ്പ ഗ്രൂപ്പ് ചെയർമാൻ അരുൺ അളഗപ്പൻ, ആസ്റ്റർ ഡി.എം. ഹെൽത്ത്കെയർ സ്ഥാപക ചെയർമാൻ ഡോ. ആസാദ് മൂപ്പൻ തുടങ്ങിയ ഒട്ടേറെ പ്രമുഖർ കമ്പനിയുടെ സ്ഥിരം ഉപഭോക്താക്കളാണ്. ബെംഗളൂരുവിലും മുംബൈയിലും ആവശ്യാനുസരണം വെറും രണ്ട് മണിക്കൂറിനകം ചാർട്ടർ വിമാന സർവീസുകൾ ലഭ്യമാക്കാനും കമ്പനിക്ക് നിലവിൽ സാധിക്കുന്നുണ്ട്.
ഇന്ത്യ ആസ്ഥാനമായി പ്രവർത്തിക്കുന്ന ഒരു സ്വകാര്യ ചാർട്ടർ ഓപ്പറേറ്റർക്ക് ചരിത്രത്തിലാദ്യമായി വടക്കേ അമേരിക്കയിലെ ലോകകപ്പ് ഫുട്ബോൾ വേദികളെ പരസ്പരം ബന്ധിപ്പിച്ച് വിപുലമായ സേവനം നൽകാൻ സാധിക്കുന്നത് രാജ്യത്തെ വ്യോമയാന (Aviation) വ്യവസായത്തിന് തന്നെ വലിയൊരു അഭിമാന നിമിഷമാണെന്ന് ഈ രംഗത്തെ വിദഗ്ധർ ചൂണ്ടിക്കാണിക്കുന്നു. ഹാലോയുടെ കൂടുതൽ സേവനങ്ങൾക്കായി www.haloairways.com എന്ന വെബ്സൈറ്റ് വഴിയോ info@haloairways.com എന്ന ഔദ്യോഗിക ഇ-മെയിൽ വഴിയോ ബന്ധപ്പെടാവുന്നതാണ്.
Story Summary:
Kochi-based Halo Airways, founded by Piravom native Shobi T. Paul, has launched premium private charter flight services connecting the major World Cup football venues across the US, Canada, and Mexico. Marking its debut in North America, Halo has partnered with Miami-based Royalty Aviation Group, promoted by another Kochi native, Captain Vibin Vincent. Operating high-end aircraft like the Gulfstream G550 and Cessna Citation, Halo Airways has previously served top Indian ministers, business tycoons, and celebrities.
