കൊച്ചി: കേരളത്തിന്റെ സാംസ്കാരിക വൈവിധ്യവും പ്രകൃതിഭംഗിയും ആസ്വദിച്ചുള്ള വിദേശി അമ്മയുടെയും മകന്റെയും 14 ദിവസത്തെ യാത്രയുടെ ദൃശ്യങ്ങൾ സോഷ്യൽ മീഡിയയിൽ തരംഗമാകുന്നു (Emma Judd Kerala Travel Viral Video). എമ്മ ജഡ്ഡും മകൻ തോമസ് ജഡ്ഡും ചേർന്ന് ഇൻസ്റ്റാഗ്രാമിൽ പങ്കുവെച്ച വീഡിയോയാണ് ലക്ഷക്കണക്കിന് ആളുകൾ ഏറ്റെടുത്തിരിക്കുന്നത്.
ഒരു പരമ്പരാഗത ക്ഷേത്രോത്സവത്തിൽ നിന്നാണ് തങ്ങൾ യാത്ര തുടങ്ങിയതെന്ന് എമ്മ പറയുന്നു. ആനകളും മേളങ്ങളും ചടങ്ങുകളും നൽകിയ അനുഭവം വാക്കുകൾക്ക് അപ്പുറമാണെന്നും വസ്ത്രധാരണത്തിലും പെരുമാറ്റത്തിലും മലയാളി പുലർത്തുന്ന അർത്ഥവത്തായ രീതികൾ തന്നെ അത്ഭുതപ്പെടുത്തിയെന്നും അവർ വ്യക്തമാക്കി.
കൊച്ചിയിലെ ബ്രണ്ടൻ ബോട്ട്യാർഡ് എന്ന ഹെറിറ്റേജ് ഹോട്ടലിലെ താമസവും കപ്പലുകളുടെയും ബോട്ടുകളുടെയും ചലനങ്ങളും തങ്ങളെ ഏറെ ആകർഷിച്ചു. ജീവൻ തുടിക്കുന്ന ഒരിടത്ത് അതിന്റെ ഭാഗമായി മാറിയതുപോലെയാണ് കൊച്ചിയിൽ തോന്നിയതെന്ന് എമ്മ വീഡിയോയിൽ വിവരിക്കുന്നു. ഒരു ഇക്കോ വില്ലേജിലെ സന്ദർശനത്തിലൂടെ പരമ്പരാഗത കൈവേലകളെക്കുറിച്ചും തലമുറകളായി കൈമാറി വരുന്ന അറിവുകളെക്കുറിച്ചും മനസ്സിലാക്കാൻ സാധിച്ചു. കേരളം വെറുമൊരു കാഴ്ചയല്ല, അതൊരു അനുഭവമാണെന്ന് എമ്മ സാക്ഷ്യപ്പെടുത്തുന്നു.
View this post on Instagram
സോഷ്യൽ മീഡിയയിൽ വീഡിയോ വൈറലായതോടെ നിരവധി വിദേശ സഞ്ചാരികൾ തങ്ങളുടെ കേരളാനുഭവങ്ങൾ പങ്കുവെച്ചു. പതിനഞ്ച് വർഷം മുൻപ് കൊച്ചിയിൽ നിന്ന് കഴിച്ച ഇലയിൽ പൊള്ളിച്ച കരിമീനിന്റെ രുചി ഇപ്പോഴും നാവിലുണ്ടെന്നാണ് ഒരു സഞ്ചാരി കമന്റ് ചെയ്തത്. ബിബിസി ഡോക്യുമെന്ററി പോലെ മനോഹരമായ ആഖ്യാനമെന്നും പലരും വീഡിയോയെ പുകഴ്ത്തി.
Summary: A viral Instagram video by Emma Judd and her son Thomas has highlighted their “extraordinary” 14-day journey across Kerala. Starting with a vibrant temple festival featuring elephants and traditional music, the duo moved to Kochi to experience its heritage and harbor life. Emma praised the meaningful culture, the peaceful eco-villages, and the warm hospitality of the locals. The travelogue has sparked nostalgia among global travelers, with many sharing their own fond memories of Kerala’s landscapes and authentic cuisine.
