സ്ത്രീധന തർക്കം; ഭാര്യാസഹോദരനെ ഭർത്താവ് കൊലപ്പെടുത്തി
Jun 10, 2024, 09:48 IST
![സ്ത്രീധന തർക്കം; ഭാര്യാസഹോദരനെ ഭർത്താവ് കൊലപ്പെടുത്തി](https://timeskerala.com/static/c1e/client/91214/uploaded/d15f7cbf0bb08a1a67d2db850fc8bb2d.png)
ബംഗളൂരു: സ്ത്രീധനം സംബന്ധിച്ച തർക്കത്തെ തുടർന്ന് മൈസൂരുവിൽ ഭാര്യാസഹോദരനെ യുവാവ് കുത്തിക്കൊലപ്പെടുത്തി. കഴിഞ്ഞ ദിവസം കുവെമ്പു നഗറിലാണ് സംഭവം നടന്നത്. അഭിഷേക് (27) എന്ന യുവാവാണ് കൊല്ലപ്പെട്ടത്. അഭിഷേകും സഹോദരീഭർത്താവായ രവിചന്ദ്രയും തമ്മിൽ വഴക്ക് നടന്നിരുന്നു. ഭാര്യ ദിവ്യയെ ദിവസവും സ്ത്രീധനത്തിന്റെ പേരിൽ രവിചന്ദ്ര ഉപദ്രവിക്കാറുണ്ടായിരുന്നു. അഞ്ചു ലക്ഷം രൂപ ആവശ്യപ്പെട്ടാണ് സംഭവദിവസം രവിചന്ദ്ര ഭാര്യയുമായി വഴക്കിട്ടത്. ഇതോടെ ദിവ്യയുടെ സഹോദരൻ അഭിഷേകിനെയും വീട്ടുകാരെയും വിളിച്ചുവരുത്തുകയും അഭിഷേക് വീട്ടിൽ എത്തിയതോടെ വാതിൽ അടച്ച ശേഷം കത്തികൊണ്ട് കുത്തിവീഴ്ത്തുകയുമായിരുന്നു. ഭാര്യാമാതാവ് ഭാഗ്യമ്മയെയും ഭാര്യയുടെ ഇളയ സഹോദരിയെയും രവിചന്ദ്ര മർദിക്കുകയും ചെയ്തു.