തൃശ്ശൂർ: വാടാനപ്പള്ളിയിൽ ബിജെപി പ്രവർത്തകർ ഭക്ഷ്യകിറ്റുകൾ വിതരണം ചെയ്തെന്നാരോപിച്ച് പ്രതിഷേധിച്ച യുഡിഎഫ് സ്ഥാനാർത്ഥി ടി.എൻ. പ്രതാപനെയും കോൺഗ്രസ് പ്രവർത്തകരെയും പൊലീസ് അറസ്റ്റ് ചെയ്ത് നീക്കി ( BJP Kit Controversy Vadanappally). യുഡിഎഫ്, എൽഡിഎഫ് പ്രവർത്തകർ ഒരേസമയം പ്രതിഷേധവുമായി എത്തിയതോടെ പ്രദേശത്ത് വലിയ സംഘർഷാവസ്ഥ നിലനിന്നിരുന്നു. പ്രതാപന്റെ അറസ്റ്റ് തടയാൻ പ്രവർത്തകർ റോഡിൽ കുത്തിയിരുന്ന് പ്രതിഷേധിച്ചെങ്കിലും സ്ഥിതിഗതികൾ വഷളാകാതിരിക്കാൻ പൊലീസ് നടപടി തുടരുകയായിരുന്നു.
തിരഞ്ഞെടുപ്പ് അട്ടിമറിക്കാനാണ് ബിജെപി കിറ്റ് വിതരണം ചെയ്തതെന്ന് ടി.എൻ. പ്രതാപൻ ആരോപിച്ചു. കിറ്റ് നൽകിയ കടയുടമയെയും ബിജെപി നേതാക്കളെയും അറസ്റ്റ് ചെയ്യുന്നതിന് പകരം പ്രതിഷേധിച്ച തങ്ങളെയാണ് പൊലീസ് ലക്ഷ്യം വയ്ക്കുന്നതെന്ന് അദ്ദേഹം പറഞ്ഞു. ആർഎസ്എസിന്റെയും ബിജെപിയുടെയും ഇത്തരം അട്ടിമറി നീക്കങ്ങളെ ജനങ്ങൾക്കൊപ്പം നിന്ന് പ്രതിരോധിക്കുമെന്നും അദ്ദേഹം കൂട്ടിച്ചേർത്തു.
വാടാനപ്പള്ളിയിലെ ‘ചാമ്പ്യൻ സൂപ്പർ മാർക്കറ്റിൽ’ കിറ്റുകൾ സൂക്ഷിച്ചിട്ടുണ്ടെന്ന വിവരത്തെത്തുടർന്നാണ് പ്രതിഷേധം ആരംഭിച്ചത്. ബിജെപി നേതാവും നടനുമായ ദേവൻ ഈ സമയം ഗോഡൗണിന് മുകളിലെ കെട്ടിടത്തിൽ ഉണ്ടായിരുന്നു. എന്നാൽ കടയുടമയെ കാണാൻ എത്തിയതാണെന്നാണ് ബിജെപി നേതാക്കളുടെ വിശദീകരണം. സംഭവസ്ഥലത്തെത്തിയ ദേവൻ പുറത്തുവന്ന് ബിജെപി പ്രവർത്തകർക്കൊപ്പം മുദ്രാവാക്യം വിളിച്ചു.
കിറ്റ് വിവാദവുമായി ബന്ധപ്പെട്ട് ചാമ്പ്യൻ ട്രേഡേഴ്സ് ഉടമ പ്രവീൺ, കിറ്റുകൾ ഓർഡർ ചെയ്ത ബിജെപി പ്രവർത്തകൻ സുധീഷ് എന്നിവരെ പൊലീസ് കസ്റ്റഡിയിലെടുത്തു. സംഘർഷാവസ്ഥ കണക്കിലെടുത്ത് സ്ഥലത്ത് കേന്ദ്രസേന ഉൾപ്പെടെയുള്ള സുരക്ഷാ വിഭാഗങ്ങളെ വിന്യസിച്ചിട്ടുണ്ട്. ബിജെപി പ്രവർത്തകർ എത്തിയ വാഹനങ്ങളിൽ പൊലീസ് വിശദമായ പരിശോധന നടത്തി.
Summary: UDF candidate T.N. Prathapan and several Congress workers were arrested by the police in Vadanappally, Thrissur, following a protest against alleged food kit distribution by BJP workers. The situation turned tense as both UDF and LDF supporters gathered to protest at a supermarket where kits were reportedly stored. While BJP leader and actor Devan claimed he was visiting the shop owner, police have taken the shop owner, Praveen, and a BJP worker, Sudheesh, into custody for further investigation. Central forces have been deployed in the area to maintain law and order.
