തൃശൂർ: കൂടൽമാണിക്യം ക്ഷേത്രത്തിലെ കഴക നിയമനവുമായി ബന്ധപ്പെട്ട തർക്കത്തിൽ സുപ്രീം കോടതിയിൽ അപ്പീൽ. കേരള ഹൈക്കോടതി പുറപ്പെടുവിച്ച ഉത്തരവിനെ ചോദ്യം ചെയ്ത് തെക്കേവാര്യം കുടുംബാംഗം സതീശൻ നമ്പൂതിരിപ്പാടാണ് പരമോന്നത കോടതിയെ സമീപിച്ചത്. അഭിഭാഷകൻ ശ്യാം മോഹൻ മുഖേനയാണ് ഹർജി സമർപ്പിച്ചത്.(Application in Supreme Court against High Court order on appointment in Koodalmanikyam Temple)
ചേർത്തല സ്വദേശിയുടെ നിയമനവുമായി ബന്ധപ്പെട്ടായിരുന്നു തർക്കത്തിന്റെ തുടക്കം. കഴക നിയമനം പാരമ്പര്യാവകാശമാണെന്നും ഇത് ക്ഷേത്രത്തിലെ ആചാരപരമായ പ്രവൃത്തിയാണെന്നുമുള്ള വിഷയത്തിൽ വ്യക്തമായ തീരുമാനം എടുക്കാതിരുന്ന ഹൈക്കോടതി, തർക്കവിഷയങ്ങൾ സിവിൽ കോടതിയിൽ ഉന്നയിക്കാനാണ് നിർദ്ദേശിച്ചത്.
കഴക നിയമനം പാരമ്പര്യാവകാശമാണോ എന്നും ഈ ജോലി ആചാരപരമായ പ്രവൃത്തിയാണോ എന്നും ഹൈക്കോടതി പരിശോധിച്ചില്ലെന്ന് ഹർജിയിൽ ചൂണ്ടിക്കാട്ടുന്നു. ഹൈക്കോടതിയുടെ മുൻ ഉത്തരവ് ഈ വിഷയത്തിൽ കൂടുതൽ അവ്യക്തതയുണ്ടാക്കിയെന്നും അതിനാൽ സുപ്രീം കോടതിയുടെ നേരിട്ടുള്ള ഇടപെടൽ വേണമെന്നുമാണ് ഹർജിക്കാരന്റെ ആവശ്യം.
