റിപ്പോർട്ട്: അൻവർ ഷരിഫ്
മലപ്പുറം: മുതിർന്ന പൗരന്മാർക്കെതിരായ അതിക്രമങ്ങൾ അവസാനിപ്പിക്കാനും വയോജന സൗഹൃദ സമൂഹം കെട്ടിപ്പടുക്കാനുമുള്ള സന്ദേശവുമായി ജില്ലയിൽ വയോജനങ്ങളോടുള്ള അതിക്രമങ്ങൾക്കെതിരായ ബോധവത്കരണ ദിനം വിപുലമായി ആചരിച്ചു (Anti-Elder Abuse Awareness Day). മലപ്പുറം ഗവൺമെന്റ് കോളേജിൽ സംഘടിപ്പിച്ച ജില്ലാതല പരിപാടി ജില്ലാ പഞ്ചായത്ത് പ്രസിഡന്റ് പി.എ. ജബ്ബാർ ഹാജി ഉദ്ഘാടനം ചെയ്തു. വയോജനങ്ങളുടെ ക്ഷേേമത്തിനും സുരക്ഷയ്ക്കുമായി സമൂഹം ഒന്നിച്ചു പ്രവർത്തിക്കേണ്ടതിന്റെ ആവശ്യകത അദ്ദേഹം ചൂണ്ടിക്കാട്ടി. മലപ്പുറം ജില്ലയിലെ വയോജന സംരക്ഷണ പ്രവർത്തനങ്ങൾ സംസ്ഥാനത്തിന് തന്നെ മാതൃകയാകുന്ന തരത്തിൽ ശക്തിപ്പെടുത്തുമെന്നും അദ്ദേഹം പറഞ്ഞു.
പരിപാടിയിൽ മുഖ്യപ്രഭാഷണം നടത്തിയ ജില്ലാ കലക്ടർ ഡോ. വിനയ് ഗോയൽ, മുതിർന്ന പൗരന്മാരെ സംരക്ഷിക്കുന്നത് നിയമപരമായ ബാധ്യത മാത്രമല്ല, ഓരോ വ്യക്തിയുടെയും സാമൂഹിക ഉത്തരവാദിത്വമാണെന്നും വ്യക്തമാക്കി. ജനസംഖ്യാനുപാതികമായി ജില്ലയിൽ വയോജനങ്ങൾക്കെതിരായ അതിക്രമങ്ങൾ കുറവാണെങ്കിലും യുവതലമുറയുടെ സജീവ ഇടപെടലിലൂടെ ഇത്തരം സംഭവങ്ങൾ പൂർണമായും ഇല്ലാതാക്കാൻ കഴിയുമെന്നും അദ്ദേഹം അഭിപ്രായപ്പെട്ടു. മലപ്പുറം ജില്ലാ ലീഗൽ സർവീസസ് അതോറിറ്റി മുഖേന മാതാപിതാക്കൾക്കും മുതിർന്ന പൗരന്മാർക്കും ആവശ്യമായ നിയമസഹായങ്ങളും സംരക്ഷണവും സൗജന്യമായി ലഭ്യമാക്കുന്നുണ്ടെന്ന് ജില്ലാ ലീഗൽ സർവീസസ് അതോറിറ്റി സെക്രട്ടറിയും സീനിയർ സിവിൽ ജഡ്ജുമായ എം. ഷാബിർ ഇബ്രാഹിം അറിയിച്ചു.
വയോജന മേഖലയിലെ മികച്ച സേവനങ്ങൾ പരിഗണിച്ച് ഉസ്മാൻ ടി. പൂക്കോട്ടൂർ, അറുമുഖൻ എം.ബി. വള്ളുവമ്പ്രം, പോരൂർ ഉണ്ണികൃഷ്ണൻ, അഹമ്മദ് ചെള്ളി വേങ്ങര, ഇറ്റാമൻ പറമ്പൻ വേങ്ങര, ശോഭാ വിജയൻ മുണ്ടുപറമ്പ, മഹേന്ദ്ര ഭൂപതി എന്നിവരെ സബ് കലക്ടർമാരായ ദിലീപ് കെ. കൈനിക്കരയും സാക്ഷി മോഹൻയും ചേർന്ന് ആദരിച്ചു. വയോജന കമ്മിറ്റി അംഗം അഡ്വ. കെ.വി. ശിവരാമൻ ദിനാചരണ പ്രതിജ്ഞ ചൊല്ലിക്കൊടുത്തു. ജില്ലയിലെ വിവിധ സായംപ്രഭാ ഹോമുകളിലെ മുതിർന്ന പൗരന്മാർ അവതരിപ്പിച്ച കലാപരിപാടികളും ചടങ്ങിന്റെ ഭാഗമായി നടന്നു.
ജില്ലാ സാമൂഹ്യനീതി ഓഫീസർ സമീർ മച്ചിങ്ങൽ, ഗവൺമെന്റ് കോളേജ് പ്രിൻസിപ്പൽ ഡോ. സൈനുൽ ആബിദ് കോട്ട, ജില്ലാ വയോജന കമ്മിറ്റി അംഗങ്ങൾ, സാമൂഹിക പ്രവർത്തകർ, വിവിധ വകുപ്പുകളിലെ ഉദ്യോഗസ്ഥർ എന്നിവർ ചടങ്ങിൽ പങ്കെടുത്തു.
Summary: Malappuram district observed the Anti-Elder Abuse Awareness Day with a series of events at the Government College, aimed at building an age-friendly society. District Panchayat President P.A. Jabbar Haji inaugurated the event, emphasizing the role of youth and technology in supporting the elderly. District Collector Dr. Vinay Goyal highlighted that protecting senior citizens is a social responsibility, while Legal Services Authority Secretary M. Shabir Ibrahim noted that free legal assistance and protection are available to the elderly in the district.
