റോഡിലെ കുഴിയില്‍ വീണ് അപകടം; വയോധികന്‍ മരിച്ചു
May 16, 2024, 18:18 IST
പാലക്കാട്: പറക്കുന്നത്ത് ജല അതോറിറ്റി പൈപ്പിടാന്‍ എടുത്ത കുഴിയില്‍ വീണ് സ്കൂട്ടര്‍ യാത്രക്കാരന്‍ മരിച്ചു. വടക്കുന്തറ സ്വദേശി സുധാകരന്‍(65) ആണ് മരിച്ചത്.
ബുധനാഴ്ച രാത്രി ഏഴരയോടെയാണ് അപകടം സംഭവിച്ചത്. സ്കൂട്ടർ കുഴിയില്‍ വീണതിനെ തുടര്‍ന്ന് തെറിച്ചു വീണ സുധാകരന്‍റെ തല പാറയില്‍ ഇടിക്കുകയായിരുന്നു. സമീപത്തുണ്ടായിരുന്നവര്‍ ഉടനെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാൻ സാധിച്ചില്ല. സ്ഥലത്ത് മുന്നറിയിപ്പ് ബോര്‍ഡുകളൊന്നും ഉണ്ടായിരുന്നില്ലെന്ന് നാട്ടുകാർ പറഞ്ഞു.
