കോഴിക്കോട്: സൗദി അറേബ്യയിൽ രണ്ട് പതിറ്റാണ്ടുകാലത്തെ ജയിൽവാസത്തിന് ശേഷം മോചിതനായി ജന്മനാട്ടിൽ തിരിച്ചെത്തിയ കോഴിക്കോട് ഫറോക്ക് സ്വദേശി അബ്ദുൽ റഹീം തന്റെ അനുഭവങ്ങൾ പങ്കുവെച്ചു (Abdul Rahim Saudi Arabia Prison Release). ജയിലിൽ കഴിഞ്ഞിരുന്ന ആദ്യത്തെ 18 വർഷവും തനിക്ക് ജീവിതത്തിലേക്ക് തിരിച്ചുവരുമെന്ന യാതൊരു പ്രതീക്ഷയും ഉണ്ടായിരുന്നില്ലെന്നും കഴിഞ്ഞ രണ്ട് വർഷമായിട്ടാണ് പ്രതീക്ഷകൾ വീണ്ടും തളിരിട്ടതെന്നും അദ്ദേഹം മാധ്യമങ്ങളോട് പ്രതികരിച്ചു. കടുത്ത മാനസിക സംഘർഷങ്ങളിലൂടെയാണ് ഈ കാലയളവിൽ താൻ കടന്നുപോയത്. നാട്ടിൽ തനിക്കായി നടന്ന വലിയ നിയമപോരാട്ടങ്ങളും കോടിക്കണക്കിന് രൂപയുടെ ദിയാധന ഫണ്ട് ശേഖരണവും ജയിലിൽ വെച്ച് അറിഞ്ഞിരുന്നുവെന്നും തന്നെ ജീവനിലേക്ക് തിരിച്ചുകൊണ്ടുവരാൻ സഹായിച്ച ലോകമെമ്പാടുമുള്ള മുഴുവൻ ആളുകൾക്കും നിയമസംവിധാനങ്ങൾക്കും ഹൃദയം നിറഞ്ഞ നന്ദി രേഖപ്പെടുത്തുന്നതായും റഹീം കൂട്ടിച്ചേർത്തു.
തന്നെപ്പോലെ നിസ്സഹായരായ നിരവധി പ്രവാസികൾ ഇപ്പോഴും സൗദി ജയിലുകളിൽ കഴിയുന്നുണ്ടെന്ന് റഹീം ഓർമ്മിപ്പിച്ചു. താൻ കഴിഞ്ഞിരുന്ന സെല്ലിൽ മാത്രം അറുപതോളം ആളുകൾ ഉണ്ടായിരുന്നുവെന്നും മലയാളി എന്ന നിലയിൽ തനിക്ക് ജയിലിൽ പ്രത്യേക പരിഗണനയും വലിയ സഹായങ്ങളും ലഭിച്ചിരുന്നുവെന്നും അദ്ദേഹം ഓർത്തെടുത്തു. ഇരുപത് വർഷത്തെ നീണ്ട കാത്തിരിപ്പിനൊടുവിൽ ഇന്ന് രാവിലെ കരിപ്പൂർ വിമാനത്താവളത്തിൽ എത്തിയ റഹീമിന് നിയമസഹായ സമിതിയും നാട്ടുകാരും ചേർന്ന് വൻ സ്വീകരണമാണ് നൽകിയത്. തുടർന്ന് ഫറോക്ക് കോടമ്പുഴയിലെ ‘സീനത്തു മൻസിൽ’ എന്ന തറവാട്ടു വീട്ടിലെത്തിയ റഹീമും ഉമ്മയും തമ്മിലുള്ള കൂടിക്കാഴ്ച കണ്ടുനിന്നവരുടെ കണ്ണുകളെ ഈറനണിയിക്കുന്നതായിരുന്നു. 2006-ൽ സ്പോൺസറുടെ മകന്റെ മരണവുമായി ബന്ധപ്പെട്ട് വധശിക്ഷയ്ക്ക് വിധിക്കപ്പെട്ട റഹീമിനെ, ആഗോള മലയാളി സമൂഹം ഒന്നടങ്കം കൈകോർത്ത് സമാഹരിച്ച 35 കോടിയോളം രൂപ ദിയാധനം നൽകിയാണ് മരണവക്ത്രത്തിൽനിന്ന് മോചിപ്പിച്ചത്.
Summary: Kozhikode native Abdul Rahim has returned to Kerala after spending 20 grueling years in a Saudi Arabian prison. Speaking to the media, Rahim shared that he had lost all hope during his first 18 years on death row and endured immense psychological trauma. He expressed his deepest gratitude to the global Malayali community and the legal committee that united to raise nearly 35 crore rupees for his blood money (Diyyah), facilitating his historic release.
