കേരളത്തിലെ വിതരണക്കാരാക്കാമെന്ന് വാഗ്ദാനം, തട്ടിയെടുത്തത് കോടികൾ; ബേസിക് ഫസ്റ്റ് ലേണിങ് ഡയറക്ടർ അറസ്റ്റിൽ
Nov 21, 2022, 12:32 IST
കോട്ടയം: കേരളത്തിലെ വിതരണക്കാരാക്കാമെന്ന് വാഗ്ദാനം ചെയ്ത് കോടികൾ തട്ടിയെന്ന കേസിൽ ഓൺലൈൻ വിദ്യാഭ്യാസ സ്ഥാപനമായ ബേസിക് ഫസ്റ്റ് ലേണിങ് പ്രൈവറ്റ് ലിമിറ്റഡ് ഡയറക്ടർ അറസ്റ്റിൽ. രൺധീർകുമാർ പ്രിയദർശി (47) ആണ് അറസ്റ്റിലായത് . മറ്റൊരു തട്ടിപ്പുകേസിൽ ഝാർഖണ്ഡിൽ അറസ്റ്റിലായ ഇയാളെ കഴിഞ്ഞ ദിവസം എറണാകുളം ക്രൈംബ്രാഞ്ച് കസ്റ്റഡിയിൽ വാങ്ങുകയായിരുന്നു. തൃപ്പൂണിത്തുറയിലെ ക്രൈംബ്രാഞ്ച് ഓഫിസിലെത്തിച്ചശേഷം പരാതിക്കാരെ വിളിച്ചുവരുത്തിയിരുന്നു. സംസ്ഥാനത്തിന്റെ വിവിധ ഭാഗങ്ങളിൽനിന്നായി അമ്പതോളം പേരിൽനിന്നാണ് ഇയാൾ പണം തട്ടിയതായാണ് കേസ്. എന്നാൽ, കേരളത്തിൽ ഇതുവരെ കമ്പനി പ്രവർത്തനം തുടങ്ങിയിട്ടില്ല. തട്ടിപ്പിനെതിരെ എറണാകുളത്തെ അഭിഭാഷകനായ വർഗീസ് പി. ചാക്കോയുടെ നേതൃത്വത്തിൽ 25 പരാതിക്കാർ ഹൈകോടതിയെ സമീപിക്കുകയും തുടർന്ന് ക്രൈംബ്രാഞ്ചിനെ അന്വേഷണത്തിന് നിയോഗിക്കുകയുമായിരുന്നു.എറണാകുളത്ത് തുറന്ന ഇവരുടെ ഓഫിസ് പൂട്ടിക്കിടക്കുകയാണ്. 24 മണിക്കൂറും ഒരു അധ്യാപകൻ ഒരു വിദ്യാർഥിക്കായി ഓൺലൈനിൽ ലഭ്യമാകുമെന്നായിരുന്നു ഇവരുടെ വാഗ്ദാനം.