മൂലമറ്റം ഇലപ്പള്ളിയില്‍ ഉരുള്‍പൊട്ടൽ; ആളപായമില്ല
തൊടുപുഴ∙ ശക്തമായ മഴ തുടരുന്ന ഇടുക്കി ജില്ലയിലെ മൂലമറ്റം ഇലപ്പള്ളിയില്‍ ഉരുള്‍പൊട്ടി. സംഭവത്തിൽ ആളപായമില്ല. കല്ലാറിനു സമീപം ദേശീയപാതയില്‍ മരം വീണു ഗതാഗതം തടസ്സപ്പെടും ചെയ്തു . ഇതിനിടെ മുല്ലപ്പെരിയാര്‍ അണക്കെട്ടിലെ ജലനിരപ്പ് 135.40 അടിയിലേക്ക് എത്തി. ഇടുക്കി അണക്കെട്ടില്‍ 2376.82 അടിയാണ് ജലനിരപ്പ്. കട്ടപ്പന ഏലപ്പാറ റൂട്ടില്‍ കരിന്തരുവി സ്‌കൂളിനു സമീപം മണ്ണിടിഞ്ഞു ഗതാഗതം തടസ്സപ്പെട്ടു.
ചാലക്കുടി പുഴയില്‍ സ്ഥിതി ആശങ്കാജനകം; തീരത്തുള്ളവര്‍ എത്രയും പെട്ടന്ന് മാറണം
ചാലക്കുടി പുഴയില്‍ സ്ഥിതി ആശങ്കാജനകമെന്ന് റവന്യൂ മന്ത്രി കെ രാജന്‍. പറമ്പിക്കുളം, പെരിങ്ങല്‍ക്കുത്ത് ഡാമുകളില്‍നിന്നും വലിയ അളവില്‍ വെള്ളം ചാലക്കുടിപ്പുഴയിലേക്ക് ഒഴുക്കുന്നുണ്ട്. ഈ സാഹചര്യത്തിൽ തീരത്തുള്ളവര്‍ അടിയന്തരമായി മാറിത്താമസിക്കണമെന്നും മന്ത്രി ആവശ്യപ്പെട്ടു. ഒരു മണിക്കൂര്‍ മുന്‍പ് പറമ്പിക്കുളത്തുള്ള സ്പില്‍ 16100 ക്യൂസെക്‌സ് ആണ്. 17480 ക്യൂസെക്‌സ് വെള്ളമാണ് ചാലക്കുടി പുഴയിലേക്കെത്തുന്നത്. പുറത്തുള്ള മഴമൂലമാണ് ഈ അളവ് കൂടിയത്. ഒഴുക്ക് കൂടിയ സാഹചര്യത്തില്‍ ചാലക്കുടി പുഴയുടെ തീരത്തുള്ള മുഴുവന്‍ പേരേയും ഒഴിപ്പിക്കാനാണ് തീരുമാനം.