തിരുവനന്തപുരം: ട്രാഫിക് നിയമലംഘനങ്ങളുടെ പിഴത്തുക കുടിശ്ശികയുള്ള വാഹന ഉടമകൾക്ക് ആശ്വാസമായി സംസ്ഥാന സർക്കാരിന്റെ പുതിയ തീരുമാനം. കുടിശ്ശികയുള്ള പിഴത്തുകയിൽ 50 ശതമാനം ഇളവ് അനുവദിക്കാൻ മന്ത്രിസഭാ യോഗം തീരുമാനിച്ചു. കൂടാതെ സംസ്ഥാനത്തെ കർഷക പെൻഷൻ ഗുണഭോക്താക്കളുടെ എണ്ണം വർദ്ധിപ്പിക്കാനും തീരുമാനമായി.(50% discount on traffic fines, Cabinet meeting with crucial decisions)
വാഹന ഉടമകൾക്ക് വലിയ ആശ്വാസം നൽകുന്ന ‘ആംനെസ്റ്റി സ്കീം’ വഴിയാണ് ഇളവ് പ്രഖ്യാപിച്ചിരിക്കുന്നത്. 31/12/2024 വരെ രജിസ്റ്റർ ചെയ്ത എല്ലാ ട്രാഫിക് നിയമലംഘനങ്ങൾക്കും ഈ ഇളവ് ബാധകമായിരിക്കും. ചുമത്തിയിട്ടുള്ള മൊത്തം പിഴയുടെ 50 ശതമാനം മാത്രം അടച്ചാൽ മതിയാകും. ഇളവ് ലഭിക്കുന്നതിനായി 30/04/2026-ന് മുൻപ് പിഴ അടച്ചു തീർക്കേണ്ടതുണ്ട്.
നിരവധി ഇ-ചെല്ലാനുകൾ കുടിശ്ശികയായതും പിഴത്തുക ഉയർന്നതും കാരണം ഉടമകൾ തുക അടയ്ക്കാത്ത സാഹചര്യത്തിലാണ് ഗതാഗത കമ്മീഷണറുടെ ശുപാർശ സർക്കാർ അംഗീകരിച്ചത്. സംസ്ഥാനത്തെ ചെറുകിട-നാമമാത്ര കർഷകർക്ക് വലിയ ആശ്വാസമായി പെൻഷൻ പദ്ധതിയിൽ കൂടുതൽ ഗുണഭോക്താക്കളെ ഉൾപ്പെടുത്തി. 2021-ന് ശേഷം 60 വയസ് തികഞ്ഞ 10,115 കർഷകരെ കൂടി പെൻഷൻ പദ്ധതിയിൽ ഉൾപ്പെടുത്തി. മാസം 2000 രൂപ വീതമാണ് അനുവദിക്കുക. പദ്ധതിക്കായി 24.276 കോടി രൂപ മന്ത്രിസഭ അനുവദിച്ചു.
