കോഴിക്കോട് : കുറ്റ്യാടിയിൽ വീടിന്റെ വിവിധ മുറികളിലായി അഞ്ച് വിഷപ്പാമ്പുകളെ കണ്ടെത്തിയത് നാടിനെ പരിഭ്രാന്തിയിലാക്കി. കുറ്റ്യാടി മീത്തലെ കാപ്പുമ്മൽ രമേശിന്റെ വീട്ടിലാണ് അതീവ വിഷമുള്ള വെള്ളിക്കെട്ടൻ ഇനത്തിൽപ്പെട്ട പാമ്പുകളെ കണ്ടെത്തിയത്.(5 snakes found inside a house in Kuttiady, Snakes were also found in the bed where the children were sleeping!)
വീട്ടിലെ കുട്ടികൾ ഉറങ്ങിക്കിടന്ന കിടക്കയിലാണ് ആദ്യം പാമ്പിനെ കണ്ടത്. ഉടൻ തന്നെ വീട്ടുകാർ കുട്ടികളെ സുരക്ഷിതമായി മാറ്റിയതിനാൽ വലിയൊരു ദുരന്തം ഒഴിവാകുകയായിരുന്നു. തുടർന്ന് നടത്തിയ വിശദമായ പരിശോധനയിലാണ് മറ്റ് മുറികളിലും പാമ്പുകളെ കണ്ടെത്തിയത്. ആകെ അഞ്ച് പാമ്പുകളെയാണ് വീട്ടിൽ നിന്ന് പിടികൂടിയത്.
ചുവരിലെ വിള്ളലുകൾ വഴിയോ വാതിലിനടിയിലെ വിടവിലൂടെയോ ആകാം പാമ്പുകൾ അകത്ത് കടന്നതെന്നാണ് പ്രാഥമിക നിഗമനം. പിടികൂടിയ അഞ്ച് പാമ്പുകളെയും വനം വകുപ്പ് ഉദ്യോഗസ്ഥർക്ക് കൈമാറാനുള്ള നടപടികൾ പൂർത്തിയാക്കി.
