തിരുവനന്തപുരം : കേരളത്തിലൂടെ ഓടുന്ന പ്രധാന ദീർഘദൂര ട്രെയിനുകൾക്കും ലോക്കൽ സർവീസുകൾക്കും വിവിധ സ്റ്റേഷനുകളിൽ പുതിയ സ്റ്റോപ്പുകൾ അനുവദിച്ചു. ചെറുകിട സ്റ്റേഷനുകളെ ആശ്രയിക്കുന്നവർക്കും ദീർഘദൂര യാത്രക്കാർക്കും ഒരുപോലെ പ്രയോജനപ്പെടുന്നതാണ് ഈ തീരുമാനം. പ്രധാനമായും ചെന്നൈ എഗ്മോർ – ഗുരുവായൂർ എക്സ്പ്രസിന് അമ്പലപ്പുഴയിലും, നിലമ്പൂർ റോഡ് – കോട്ടയം എക്സ്പ്രസിന് തുവ്വൂർ, വലപ്പുഴ സ്റ്റേഷനുകളിലും പുതിയ സ്റ്റോപ്പുകൾ അനുവദിച്ചു. മധുരൈ – ഗുരുവായൂർ എക്സ്പ്രസ് ഇനി മുതൽ ചെറിയനാട് സ്റ്റേഷനിലും നിർത്തും.(Railway’s gift to Kerala, 16 trains will have more stops)
തിരുവനന്തപുരം – വെരാവൽ എക്സ്പ്രസിന് പരപ്പനങ്ങാടി, വടകര സ്റ്റേഷനുകളിലും, നാഗർകോവിൽ – ഗാന്ധിധാം വീക്ക്ലി എക്സ്പ്രസിന് പരപ്പനങ്ങാടിയിലും പുതിയ സ്റ്റോപ്പുകൾ ലഭിച്ചു. ഗുരുവായൂർ – തിരുവനന്തപുരം ഇന്റർസിറ്റി എക്സ്പ്രസിന് പൂങ്കുന്നം സ്റ്റേഷനിലും, നാഗർകോവിൽ – കോട്ടയം എക്സ്പ്രസിന് ധനുവച്ചപുരത്തും സ്റ്റോപ്പുകൾ അനുവദിച്ചിട്ടുണ്ട്. തൃശൂർ – കണ്ണൂർ എക്സ്പ്രസ് കണ്ണൂർ സൗത്ത് സ്റ്റേഷനിലും, പുനലൂർ – മധുരൈ എക്സ്പ്രസ് ബാലരാമപുരം സ്റ്റേഷനിലും, പാലരുവി എക്സ്പ്രസ് കിളിക്കൊല്ലൂർ സ്റ്റേഷനിലും നിർത്തുന്നതാണ്.
കൂടാതെ, തിരുവനന്തപുരം നോർത്ത് – ഭാവ്നഗർ എക്സ്പ്രസ്, എറണാകുളം – പുണെ എക്സ്പ്രസ് എന്നിവയ്ക്ക് വടകരയിലും, ഹിസാർ – കോയമ്പത്തൂർ എക്സ്പ്രസിന് തിരൂരിലും പുതിയ സ്റ്റോപ്പുകൾ ലഭിച്ചു. ചെന്നൈ സെൻട്രൽ – പാലക്കാട് എക്സ്പ്രസിന് കൊല്ലങ്കോട് സ്റ്റേഷനിലും, എറണാകുളം – കായംകുളം മെമുവിന് ഏറ്റുമാനൂരിലും, നിലമ്പൂർ – ഷൊർണൂർ മെമുവിന് തുവ്വൂർ സ്റ്റേഷനിലും പുതിയ സ്റ്റോപ്പുകൾ അനുവദിച്ചിട്ടുണ്ട്. പുതിയ സ്റ്റോപ്പുകൾ നിലവിൽ വരുന്നതോടെ ട്രെയിനുകളുടെ സമയക്രമത്തിൽ ഉണ്ടാകുന്ന മാറ്റങ്ങൾ റെയിൽവേ ഉടൻ ഔദ്യോഗികമായി പുറത്തിറക്കും.
