തിരുവനന്തപുരം: ഭരണത്തുടർച്ച ആശംസിച്ച കമൽ ഹാസന് മറുപടിയുമായി മുഖ്യമന്ത്രി പിണറായി വിജയൻ. മതേതരത്വത്തിന്റെയും സാഹോദര്യത്തിന്റെയും മണ്ണായ കേരളത്തിൽ ആരും ഒരിക്കലും അന്യരല്ലെന്നും കമൽ ഹാസന്റെ ഊഷ്മളമായ ആശംസകൾക്ക് നന്ദി അറിയിക്കുന്നുവെന്നും മുഖ്യമന്ത്രി തന്റെ ഫേസ്ബുക്ക് കുറിപ്പിലൂടെ വ്യക്തമാക്കി.(You are never an outsider here, Chief Minister Pinarayi Vijayan thanks Kamal Haasan )
കമൽ ഹാസന്റെ ആശംസാക്കുറിപ്പ് പങ്കുവെച്ചുകൊണ്ടാണ് മുഖ്യമന്ത്രി പ്രതികരിച്ചത്. ജനക്ഷേമത്തിലും യഥാർത്ഥ വികസനത്തിലും ഉറച്ചുനിന്നാണ് സർക്കാർ മുന്നോട്ട് പോകുന്നത്. മതേതര മനോഭാവം നിലനിർത്താൻ നമുക്ക് ഒരുമിച്ച് നിൽക്കാം. കേരളം തീർച്ചയായും വിജയിക്കുമെന്നും മുഖ്യമന്ത്രി കൂട്ടിച്ചേർത്തു. നേരത്തെ, സോഷ്യൽ മീഡിയയിൽ പങ്കുവെച്ച വീഡിയോയിലൂടെയാണ് കമൽ ഹാസൻ ഇടതുപക്ഷത്തിന് പിന്തുണ പ്രഖ്യാപിച്ചത്.
കുറിപ്പിൻ്റെ പൂർണ്ണരൂപം
കമൽഹാസൻ, നിങ്ങളുടെ ഊഷ്മളമായ ആശംസകൾക്കും നിരന്തരമായ പിന്തുണയ്ക്കും നന്ദി! നിങ്ങൾ ഇവിടെ ഒരിക്കലും അന്യനല്ല. കേരളം നമ്മുടേത് പോലെ തന്നെ നിങ്ങളുടേതുമാണ്. മതേതരത്വത്തിന്റെയും സാഹോദര്യത്തിന്റെയും നമ്മുടെ നാട്ടിൽ ആരും ഒരിക്കലും അന്യനല്ല. ജനങ്ങളുടെ ക്ഷേമത്തിലും യഥാർത്ഥ വികസനത്തിലും ഉറച്ചുനിൽക്കുന്നതിലൂടെയാണ് ഞങ്ങൾ മുന്നോട്ട് പോകുന്നത്. ഒരുമിച്ച്, പുരോഗമന മനോഭാവം നിലനിർത്താം. അതെ, കേരളം തീർച്ചയായും വിജയിക്കും!
