തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിനുള്ള (Kerala Assembly Election 2026) സ്ഥാനാർത്ഥി പട്ടികയ്ക്ക് രൂപം നൽകുന്നതിനായി കോൺഗ്രസ് സ്ക്രീനിംഗ് കമ്മിറ്റി ബുധനാഴ്ച യോഗം ചേരും. ഗ്രൂപ്പ് സമവാക്യങ്ങൾക്കും മറ്റ് പരിഗണനകൾക്കും അപ്പുറം ‘വിജയസാധ്യത’ (Winability) മാത്രമാകും ഇത്തവണ മാനദണ്ഡമെന്ന് എഐസിസി ജനറൽ സെക്രട്ടറി ദീപ ദാസ് മുൻഷി വ്യക്തമാക്കി.
പ്രതിപക്ഷ നേതാവ് നയിക്കുന്ന രാഷ്ട്രീയ ജാഥ ആരംഭിക്കുന്നതിന് മുമ്പ് തന്നെ സ്ഥാനാർത്ഥികളുടെ ആദ്യഘട്ട പട്ടിക പുറത്തിറക്കാനാണ് കോൺഗ്രസ് ലക്ഷ്യമിടുന്നത്. സ്ക്രീനിംഗ് കമ്മിറ്റി ചെയർമാൻ മധുസൂദൻ മിസ്ത്രിയുടെ അധ്യക്ഷതയിലാണ് തിരുവനന്തപുരത്ത് യോഗം നടക്കുക. കെപിസിസി പ്രസിഡന്റ് സണ്ണി ജോസഫ്, പ്രതിപക്ഷ നേതാവ് തുടങ്ങിയ പ്രമുഖ നേതാക്കൾ ചർച്ചകളിൽ പങ്കുചേരും.
സംസ്ഥാനത്ത് ഇത്തവണ യുഡിഎഫ് ഭരണത്തിൽ വരുമെന്ന് ദീപ ദാസ് മുൻഷി ആത്മവിശ്വാസം പ്രകടിപ്പിച്ചു. ചിട്ടയായ പ്രവർത്തനങ്ങളിലൂടെയും കൃത്യമായ പ്ലാനിംഗിലൂടെയും മുന്നോട്ട് പോകുമെന്നും അവർ പറഞ്ഞു.
സ്ഥാനാർത്ഥി നിർണ്ണയത്തിൽ പുതുമുഖങ്ങൾക്കും യുവാക്കൾക്കും എത്രത്തോളം പ്രാധാന്യം ലഭിക്കുമെന്നത് രാഷ്ട്രീയ കേന്ദ്രങ്ങൾ ഉറ്റുനോക്കുകയാണ്. വിജയസാധ്യതയുള്ളവരെ നേരത്തെ തന്നെ കണ്ടെത്തി മണ്ഡലങ്ങളിൽ സജീവമാക്കാനാണ് ഹൈക്കമാൻഡ് നിർദ്ദേശം.
