തിരുവനന്തപുരം: അനിശ്ചിതത്വങ്ങൾക്കൊടുവിൽ ബിജെപിയുടെ രണ്ടാം ഘട്ട സ്ഥാനാർത്ഥി പട്ടിക പ്രഖ്യാപിച്ചു. 39 മണ്ഡലങ്ങളിലെ സ്ഥാനാർത്ഥികളെയാണ് ബിജെപി നേതൃത്വം ഔദ്യോഗികമായി അറിയിച്ചത്. മുതിർന്ന നേതാവ് കുമ്മനം രാജശേഖരൻ ആറന്മുളയിൽ മത്സരിക്കുമ്പോൾ, റിയാലിറ്റി ഷോ താരം ഡോ. റോബിൻ രാധാകൃഷ്ണന്റെ സ്ഥാനാർത്ഥിത്വം കുണ്ടറയിൽ ശ്രദ്ധേയമാകും.(BJP second phase candidate list out, Kummanam in Aranmula)
ഗുരുവായൂർ മണ്ഡലത്തിൽ അഡ്വ. ബി. ഗോപാലകൃഷ്ണനും ധർമ്മടത്ത് മുഖ്യമന്ത്രി പിണറായി വിജയനെതിരെ കെ. രഞ്ജിത്തും ബിജെപിക്കായി വോട്ട് തേടും. കണ്ണൂർ, തിരുവനന്തപുരം സെൻട്രൽ മണ്ഡലങ്ങളിലെ സ്ഥാനാർത്ഥികളെ ബിജെപി ഇപ്പോൾ പ്രഖ്യാപിച്ചിട്ടില്ല. കോൺഗ്രസ് സ്ഥാനാർത്ഥി പട്ടികയുമായി ബന്ധപ്പെട്ട് കെ. സുധാകരൻ സ്വീകരിക്കുന്ന നിലപാട് നിരീക്ഷിച്ച ശേഷം ഈ സീറ്റുകളിൽ തീരുമാനമെടുക്കാനാണ് ബിജെപി നീക്കം.
കാസർകോട് അശ്വിനി എം.എൽ, കല്ല്യാശ്ശേരിയിൽ എ.വി. സനിൽകുമാർ, തളിപ്പറമ്പിൽ എൻ. ഹരിദാസ്, തലശ്ശേരിയിൽ ഒ. നിധീഷ്, കൂത്തുപറമ്പിൽ അഡ്വ. ഷിജിലാൽ, മട്ടന്നൂരിൽ ബിജു ഏലക്കുഴി എന്നിവർ മത്സരിക്കും. കൽപ്പറ്റയിൽ പ്രശാന്ത് മലവയലും കൊണ്ടോട്ടിയിൽ പി. സുബ്രഹ്മണ്യനും ഏറനാട് അഡ്വ. എൻ. ശ്രീപ്രകാശുമാണ് സ്ഥാനാർത്ഥികൾ. മഞ്ചേരിയിൽ പത്മശ്രീ എം, പെരിന്തൽമണ്ണയിൽ അഡ്വ. കെ.പി. ബാബുരാജ്, മങ്കടയിൽ ലിജോയ് പോൾ, മലപ്പുറത്ത് അശ്വതി ഗുപ്തകുമാർ എന്നിവരെയും പാർട്ടി നിയോഗിച്ചു.
വേങ്ങരയിൽ ജയകൃഷ്ണൻ വി.എൻ, വള്ളിക്കുന്നിൽ എം. പ്രേമൻ മാസ്റ്റർ, തിരൂരങ്ങാടിയിൽ റിജു സി. രാഘവ്, താനൂരിൽ ദീപ പുഴക്കൽ, തിരൂരിൽ കെ. നാരായണൻ മാസ്റ്റർ, തവനൂരിൽ രവി തേലത്ത് എന്നിവരാണ് മലപ്പുറം ജില്ലയിലെ മറ്റ് സ്ഥാനാർത്ഥികൾ. പാലക്കാട് ജില്ലയിലെ തൃത്താലയിൽ വി. ഉണ്ണികൃഷ്ണൻ മാസ്റ്ററും പട്ടാമ്പിയിൽ അഡ്വ. പി. മനോജും കോങ്ങാട് രേണു സുരേഷും തരൂരിൽ സുരേഷ് ബാബുവും ചിറ്റൂരിൽ പ്രാണേഷ് രാജേന്ദ്രനും ആലത്തൂരിൽ കെ.വി. പ്രസന്ന കുമാറും ജനവിധി തേടും.
തൃശൂർ ജില്ലയിൽ വടക്കാഞ്ചേരിയിൽ അഡ്വ. ടി.എസ്. ഉല്ലാസ് ബാബു, ഒല്ലൂരിൽ ബിജോയ് തോമസ്, നാട്ടികയിൽ സി.സി. മുകുന്ദൻ, പുതുക്കാട് എ. നാഗേഷ് എന്നിവരാണ് പട്ടികയിലുള്ളത്. എറണാകുളം ജില്ലയിലെ ആലുവയിൽ എം.എ. ബ്രഹ്മരാജ്, പറവൂരിൽ വത്സല പ്രസന്നകുമാർ, എറണാകുളത്ത് പി.ആർ. ശിവശങ്കർ എന്നിവർ മത്സരിക്കും. ചങ്ങനാശ്ശേരിയിൽ ബി. രാധാകൃഷ്ണമേനോനും ആലപ്പുഴയിൽ എം.ജെ. ജോബും കൊല്ലത്ത് ഡോ. എൻ. പ്രതാപ് കുമാറുമാണ് സ്ഥാനാർത്ഥികൾ.
