അബുദാബി: പശ്ചിമേഷ്യൻ സംഘർഷം യുഎഇയിലേക്കും വ്യാപിച്ചതോടെ അബുദാബിയിൽ കുടുങ്ങിക്കിടക്കുന്ന ഇംഗ്ലണ്ട് ക്രിക്കറ്റ് ടീമിന്റെ സുരക്ഷയ്ക്കായി സഹായം അഭ്യർത്ഥിച്ച് പ്രമുഖ താരം ജോണി ബെയർസ്റ്റോ. ബ്രിട്ടീഷ് പ്രധാനമന്ത്രി കെയർ സ്റ്റാർമറോട് സോഷ്യൽ മീഡിയയിലൂടെയാണ് താരം ഈ അടിയന്തര അപേക്ഷ നടത്തിയത്.(Jonny Bairstow, stranded in Abu Dhabi with Team England, seeks help from British Prime Minister)
ഇംഗ്ലണ്ട് ലയൺസ് ടീമിനൊപ്പം പരിശീലകന്റെ റോളിൽ അബുദാബിയിലുള്ള ബെയർസ്റ്റോ, നിലവിലെ സംഘർഷാവസ്ഥയിൽ ടീമിന്റെ സുരക്ഷയെക്കുറിച്ച് വലിയ ആശങ്കയാണ് പ്രകടിപ്പിച്ചത്. പ്രധാനമന്ത്രി പങ്കുവെച്ച ഒരു ഔദ്യോഗിക പ്രസ്താവനയ്ക്ക് മറുപടിയായി, “ഞങ്ങളെ എങ്ങനെയെങ്കിലും ഒന്ന് നാട്ടിലെത്തിക്കാമോ?” എന്ന് ബെയർസ്റ്റോ എക്സിൽ കുറിച്ചു.
അബുദാബിയിൽ ശക്തമായ സ്ഫോടനങ്ങൾ റിപ്പോർട്ട് ചെയ്ത പശ്ചാത്തലത്തിൽ, ഇന്ന് നടക്കേണ്ടിയിരുന്ന പാകിസ്ഥാൻ എ ടീമും ഇംഗ്ലണ്ട് എ ടീമും തമ്മിലുള്ള ഏകദിന മത്സരം സുരക്ഷാ കാരണങ്ങളാൽ റദ്ദാക്കി. സ്ഫോടനങ്ങളിൽ ഒരാൾ കൊല്ലപ്പെട്ടതായും വിവരമുണ്ട്. അബുദാബിയിലെ യാസ് ഐലന്റിന് മുകളിൽ യുദ്ധവിമാനങ്ങൾ വട്ടമിട്ടു പറക്കുന്നത് പ്രദേശവാസികളിൽ ഭീതി പടർത്തിയിരിക്കുകയാണ്.
