അഹമ്മദാബാദ്: ഐ.പി.എൽ 2026ൽ ചെന്നൈ സൂപ്പർ കിങ്സിനെ 89 റൺസിന് തകർത്തെറിഞ്ഞ് ഗുജറാത്ത് ടൈറ്റൻസ്. നരേന്ദ്ര മോദി സ്റ്റേഡിയത്തിൽ നടന്ന പോരാട്ടത്തിൽ ഗുജറാത്ത് ഉയർത്തിയ 230 റൺസ് വിജയലക്ഷ്യം പിന്തുടർന്ന ചെന്നൈ 13.4 ഓവറിൽ വെറും 140 റൺസിന് എല്ലാവരും പുറത്തായി. ഈ തകർപ്പൻ ജയത്തോടെ ഗുജറാത്ത് ടൈറ്റൻസ് പോയിന്റ് പട്ടികയിൽ ആദ്യ രണ്ട് സ്ഥാനങ്ങളിൽ ഇടംപിടിച്ചപ്പോൾ, ചെന്നൈ സൂപ്പർ കിങ്സ് പ്ലേ ഓഫ് കാണാതെ പുറത്തായി.(Gujarat Titans Defeat CSK By Eighty Nine Runs To Secure Top Two Spot In IPL)
ഏഴാം സ്ഥാനക്കാരായാണ് ചെന്നൈ ഇത്തവണ സീസൺ അവസാനിപ്പിച്ചത്. സിഎസ്കെ പ്ലേ ഓഫ് യോഗ്യത നേടാതെ പുറത്താകുന്നത് ഇത് തുടർച്ചയായ മൂന്നാം തവണയാണ്. മത്സരത്തിൽ ടോസ് നേടിയ ചെന്നൈ സൂപ്പർ കിങ്സ് ഗുജറാത്തിനെ ബാറ്റിങ്ങിന് അയക്കുകയായിരുന്നു. എന്നാൽ ചെന്നൈയുടെ കണക്കുകൂട്ടലുകൾ തെറ്റിച്ചുകൊണ്ട് ടൈറ്റൻസ് ഓപ്പണർമാരായ ശുഭ്മൻ ഗില്ലും സായ് സുദർശനും ചേർന്ന് ഒന്നാം വിക്കറ്റിൽ 125 റൺസിന്റെ മികച്ച കൂട്ടുകെട്ടുണ്ടാക്കി. ഗിൽ 37 പന്തിൽ 64 റൺസെടുത്തപ്പോൾ, 53 പന്തിൽ 84 റൺസുമായി സായ് സുദർശൻ ഇന്നിങ്സിന്റെ നട്ടെല്ലായി മാറി. അവസാന ഓവറുകളിൽ തകർത്തടിച്ച ജോസ് ബട്ട്ലർ 27 പന്തിൽ പുറത്താകാതെ 57 റൺസ് കൂടി ചേർത്തതോടെ ഗുജറാത്ത് നിശ്ചിത 20 ഓവറിൽ 4 വിക്കറ്റ് നഷ്ടത്തിൽ 229 റൺസെന്ന കൂറ്റൻ സ്കോർ പടുത്തുയർത്തി.
ഭീമമായ ലക്ഷ്യത്തിലേക്ക് ബാറ്റ് വീശിയ ചെന്നൈയുടെ തുടക്കം തന്നെ തകർച്ചയോടെയായിരുന്നു. ഇന്നിങ്സിലെ ആദ്യ പന്തിൽ തന്നെ ഓപ്പണർ സഞ്ജു സാംസൺ ഗോൾഡൻ ഡക്കായി പുറത്തായി. തുടർന്ന് ചെന്നൈ ബാറ്റിങ് നിരയ്ക്ക് തകർച്ചയിൽ നിന്ന് കരകയറാനായില്ല. 17 പന്തിൽ 47 റൺസുമായി ശിവം ദുബെ വെടിക്കെട്ട് പ്രകടനം നടത്തിയെങ്കിലും മറ്റ് ബാറ്റർമാർ അമ്പേ പരാജയപ്പെട്ടു. 3 ഓവറിൽ 26 റൺസ് മാത്രം വഴങ്ങി സഞ്ജു സാംസൺ, ഋതുരാജ് ഗെയ്ക്വാദ്, ഉർവിൽ പട്ടേൽ എന്നിവരുടെ നിർണായക വിക്കറ്റുകൾ വീഴ്ത്തിയ മുഹമ്മദ് സിറാജാണ് ചെന്നൈയെ തകർത്തത്. സിറാജ് തന്നെയാണ് കളിയിലെ താരം. സിറാജിന് പുറമെ കഗിസോ റബാഡ (3/32), റാഷിദ് ഖാൻ (3/18) എന്നിവരും മൂന്ന് വിക്കറ്റുകൾ വീതം വീഴ്ത്തി ഗുജറാത്തിന്റെ വിജയം അനായാസമാക്കി. 14 പോയിന്റോടെ ഗുജറാത്ത് ടൈറ്റൻസ് പ്ലേ ഓഫിലെ രണ്ടാം സ്ഥാനം ഉറപ്പിച്ചു.
Story Summary
Gujarat Titans crushed Chennai Super Kings by 89 runs in IPL 2026, securing a spot in the top two while knocking CSK out of the playoff race. Chasing GT’s massive total of 229/4, CSK collapsed for 140 runs in 13.4 overs following a stellar bowling display by Mohammed Siraj, Kagiso Rabada, and Rashid Khan.
