കൊച്ചി: താരസംഘടനയായ ‘അമ്മ’യിലെ (AMMA) ആഭ്യന്തര തർക്കങ്ങളും ഭാരവാഹികൾക്കിടയിലെ ഭിന്നതയും പരസ്യപ്പെടുത്തി നടൻ ടിനി ടോം (Tini Tom AMMA Association Dispute). ഭരണപരമായ കാര്യങ്ങൾ എങ്ങനെ കൈകാര്യം ചെയ്യണമെന്ന് അറിയാത്തവരുടെ ഇടപെടലുകളാണ് സംഘടനയെ പുതിയ വിവാദങ്ങളിലേക്ക് വലിച്ചിഴച്ചതെന്ന് അദ്ദേഹം കൊച്ചിയിൽ വിളിച്ചുചേർത്ത വാർത്താസമ്മേളനത്തിൽ വ്യക്തമാക്കി.
സംഘടനയുടെ ട്രഷറർ ഉണ്ണി ശിവപാൽ പരിധിവിട്ട് ഭരണപരമായ കാര്യങ്ങളിൽ ഇടപെട്ടതാണ് പ്രശ്നങ്ങൾക്ക് കാരണം. ട്രഷററുടെ ഉത്തരവാദിത്തങ്ങൾ എന്താണെന്ന് അദ്ദേഹത്തിന് ബോധ്യമില്ല. സംഘടനയിൽ വ്യാപകമായ അധികാരദുർവിനിയോഗം നടന്നു. നിലവിലെ പ്രസിഡന്റ് ശ്വേത മേനോന് യാതൊരു അധികാരവുമില്ലെന്നും അവർ വെറും റബ്ബർ സ്റ്റാമ്പ് മാത്രമായി മാറിയിരിക്കുകയാണെന്നും ടിനി ടോം കുറ്റപ്പെടുത്തി.
ബൈലോ പ്രകാരം പൂർണ്ണ അധികാരമുള്ള ജനറൽ സെക്രട്ടറി കൺകൺ (കുക്കു) പരമേശ്വരന്റെ അധികാരം ദുരുപയോഗം ചെയ്യപ്പെടുകയാണ്. ഓഫീസ് ജീവനക്കാരി അതുല്യയെ എക്സിക്യൂട്ടീവ് കമ്മിറ്റിയോ പ്രസിഡന്റോ അറിയാതെ ഏകപക്ഷീയമായി പിരിച്ചുവിട്ടത് നിയമവിരുദ്ധമാണ്. വിദേശത്തായിരുന്ന താൻ ഈ സന്ദേശം കണ്ട് ഞെട്ടിപ്പോയി. തുടർന്ന് അടിയന്തര യോഗം ചേർന്നാണ് പിരിച്ചുവിടൽ നടപടി റദ്ദാക്കിയത്- ടിനി ടോം പറഞ്ഞു.
മുൻ ജനറൽ സെക്രട്ടറി ഇടവേള ബാബുവിനെപ്പോലെയുള്ളവർ മാറിയപ്പോഴാണ് സംഘടന മുന്നോട്ട് കൊണ്ടുപോകുന്നതിന്റെ ബുദ്ധിമുട്ട് ബോധ്യപ്പെട്ടത്. ഒരു ബൾബ് മാറ്റിയാൽ പോലും യോഗത്തിൽ അറിയിച്ചിരുന്ന സുതാര്യത മുൻപ് ഉണ്ടായിരുന്നു. ഇപ്പോൾ പല തീരുമാനങ്ങളും ആരാണ് എടുക്കുന്നതെന്ന് വ്യക്തമല്ല.
ചില ഔദ്യോഗിക വീഴ്ചകളുടെ അടിസ്ഥാനത്തിലാണ് ട്രഷറർ ഉണ്ണി ശിവപാലിനോട് നിർബന്ധിത അവധിയിൽ പ്രവേശിക്കാൻ പ്രസിഡന്റ് ഉൾപ്പെടെയുള്ളവർ നിർദ്ദേശിച്ചതെന്നും, തുടർന്ന് അക്കൗണ്ട്സ് കമ്മിറ്റി അംഗമായ നടൻ കൈലാഷിന് താൽക്കാലിക ചുമതല നൽകിയതായും ടിനി ടോം കൂട്ടിച്ചേർത്തു. മുൻ ജനറൽ സെക്രട്ടറി ഇടവേള ബാബു, നടൻ കൈലാഷ് എന്നിവരും വാർത്താസമ്മേളനത്തിൽ പങ്കെടുത്തു.
News Summary: Actor and AMMA Executive Committee member Tini Tom leveled serious allegations of power abuse and administrative failures against the organization’s leadership during a press conference in Kochi. Tini Tom stated that the crisis began when individuals without administrative knowledge started interfering in operations, pointing out that Treasurer Unni Shivapal overstepped his boundaries. He criticized that the current President Shwetha Menon has been reduced to a mere “rubber stamp” while the actual powers of General Secretary Kukku Parameswaran are being misused. Tom revealed that the arbitrary termination of front-office employee Athulya was unlawful and was revoked only after an emergency intervention. He credited former General Secretary Edavela Babu for past transparency and noted that actor Kailash has been given temporary charge as the Treasurer while Shivapal is on compulsory leave.
