ഹരിദ്വാർ: ബദരീനാഥ് ക്ഷേത്രത്തിലെ കാണിക്ക മോഷണവുമായി ബന്ധപ്പെട്ട വിവാദങ്ങൾക്കൊടുവിൽ ഹരിദ്വാറിലെ പ്രശസ്തമായ മാനസ ദേവി ക്ഷേത്രത്തിൽ പൂജാരിമാർക്കും ജീവനക്കാർക്കും പോക്കറ്റില്ലാത്ത വസ്ത്രധാരണ രീതി ഏർപ്പെടുത്തി. ക്ഷേത്ര ഭരണത്തിൽ കൂടുതൽ സുതാര്യത ഉറപ്പാക്കാനും ഭക്തർ സമർപ്പിക്കുന്ന പണം ദുരുപയോഗം ചെയ്യുന്നത് തടയാനുമാണ് ഈ പുതിയ പരിഷ്കാരമെന്ന് മനസാ ദേവി ക്ഷേത്ര ട്രസ്റ്റ് ചെയർമാൻ രവീന്ദ്ര പുരി അറിയിച്ചു.(Mansa Devi Temple Imposes Pocketless Dress Code For Priests)
ക്ഷേത്രത്തിലെ എല്ലാ പൂജാരിമാരും ജീവനക്കാരും ഈ നിർദ്ദേശം സ്വീകരിച്ചതായും ഡ്യൂട്ടിയിലുള്ളപ്പോൾ പോക്കറ്റില്ലാത്ത കുർത്തകളാണ് ധരിക്കുന്നതെന്നും അദ്ദേഹം വ്യക്തമാക്കി. ഇതിനൊപ്പം ക്ഷേത്ര പരിസരത്ത് 65 സിസിടിവി ക്യാമറകൾ സ്ഥാപിച്ചിട്ടുണ്ടെന്നും ക്യാമറയിൽ കുടുങ്ങുന്ന കുറ്റക്കാർക്കെതിരെ കർശന നടപടിയുണ്ടാകുമെന്നും അദ്ദേഹം കൂട്ടിച്ചേർത്തു. ഭക്തർ നൽകുന്ന കാണിക്കകൾ പൂജാരിമാർക്ക് നേരിട്ട് ലഭിക്കുന്നതിന് പകരം ക്ഷേത്ര ട്രസ്റ്റിലേക്ക് തന്നെ പോകുന്നുവെന്ന് ഉറപ്പാക്കാനാണ് ഈ നടപടി.
ജൂലൈ രണ്ടിന് ബദരീനാഥ് ക്ഷേത്രത്തിൽ ഭക്തർ സമർപ്പിച്ച കാണിക്ക പണം എണ്ണുന്നതിനിടെ ലക്ഷക്കണക്കിന് രൂപ മോഷ്ടിക്കപ്പെട്ടതുമായി ബന്ധപ്പെട്ട് പ്രത്യേക അന്വേഷണ സംഘത്തിന്റെ അന്വേഷണം പുരോഗമിക്കുന്നതിനിടെയാണ് ഈ പുതിയ തീരുമാനം. ബദരീനാഥ് ക്ഷേത്രത്തിലെ സിസിടിവി ദൃശ്യങ്ങൾ അടങ്ങിയ നെറ്റ്വർക്ക് വീഡിയോ റെക്കോർഡർ അന്വേഷണ സംഘം പിടിച്ചെടുത്തിട്ടുണ്ട്. ഇതിൽ ജൂൺ 22, 25 തീയതികളിലെ ദൃശ്യങ്ങൾ ഉള്ളതായും, മുൻപ് ഡിലീറ്റ് ചെയ്യപ്പെട്ട പണം എണ്ണുന്ന ദൃശ്യങ്ങൾ വീണ്ടെടുക്കാനായി ഫോറൻസിക് ലാബിലേക്ക് അയക്കുമെന്നും എസ്ഐടി ഓഫീസർ മഹാദേവ് ഉനിയാൽ വ്യക്തമാക്കി.
Story Summary
Following the recent donation theft controversy at the Badrinath Temple, the Haridwar Mansa Devi Temple has implemented a pocketless dress code for its priests and staff. Temple Trust Chairman Ravindra Puri stated that the move, along with the installation of 65 CCTV cameras, aims to ensure transparency and ensure offerings go directly to the temple.
