മുംബൈ: തന്റെ മക്കൾക്ക് വലിയ സ്ക്രീനിൽ കാണുന്നതിനായി സിനിമയിൽ വീണ്ടും നായികയായി സജീവമാകാൻ ആഗ്രഹം പ്രകടിപ്പിച്ച് ബോളിവുഡിന്റെ പ്രിയതാരം ശിൽപ്പ ഷെട്ടി (Shilpa Shetty Bollywood comeback interview). ദീർഘകാലമായി ബോളിവുഡ് സിനിമകളിൽ നിന്നും വിട്ടുനിൽക്കുന്ന താരം, പഴയതുപോലെ ശക്തമായ കഥാപാത്രങ്ങളിലൂടെയുള്ള ഒരു മടങ്ങിവരവാണ് ഇപ്പോൾ ലക്ഷ്യമിടുന്നത്. ഒരു ദേശീയ മാധ്യമത്തിന് നൽകിയ അഭിമുഖത്തിലാണ് നടി തന്റെ മനസ്സ് തുറന്നത്.
തന്റെ സിനിമകൾ മക്കൾ ഇതുവരെ തിയേറ്ററിലെ വലിയ സ്ക്രീനിൽ കണ്ടിട്ടില്ലെന്നും അതാണ് ഇത്തരമൊരു തീരുമാനത്തിന് പിന്നിലെ പ്രധാന കാരണമെന്നും ശിൽപ്പ ഷെട്ടി വ്യക്തമാക്കി. മക്കളായ സമിഷയും വിയാനും ഡിജിറ്റൽ പ്ലാറ്റ്ഫോമുകളിലൂടെ (OTT) മാത്രമേ തന്റെ അഭിനയം കണ്ടിട്ടുള്ളൂ. “തിയേറ്ററുകളിൽ റിലീസ് ചെയ്യുന്ന മികച്ചൊരു ചിത്രത്തിന്റെ ഭാഗമാകാൻ എനിക്ക് താല്പര്യമുണ്ട്. എന്റെ മകൻ വിയാൻ 2023-ൽ ഞാൻ അഭിനയിച്ച ‘സുഖീ’ എന്ന ചിത്രം വലിയ സ്ക്രീനിൽ കണ്ടിട്ടുണ്ട്. എന്നാൽ അതൊരു പ്രിവ്യൂ തിയേറ്ററിൽ മാത്രമായിരുന്നു. അതുകൊണ്ടാണ് തിയേറ്റർ റിലീസുകളിലൂടെ മക്കൾക്ക് മുന്നിലെത്താൻ ആഗ്രഹിക്കുന്നത്,” താരം പറഞ്ഞു.
അതേസമയം, മുൻപ് സിനിമയിൽ സജീവമാകാൻ നിരവധി അവസരങ്ങൾ വന്നിരുന്നുവെങ്കിലും താൻ മനപ്പൂർവ്വം അവ വേണ്ടെന്നു വെക്കുകയായിരുന്നുവെന്നും ശിൽപ്പ ഷെട്ടി വെളിപ്പെടുത്തി. “ഞാൻ ‘നോ’ പറഞ്ഞ പല സന്ദർഭങ്ങളുമുണ്ടായിട്ടുണ്ട്. ആ തീരുമാനങ്ങൾക്ക് പിന്നിൽ തീർത്തും ന്യായമായ കാരണങ്ങളുമുണ്ടായിരുന്നു. അക്കൂട്ടത്തിൽ ചില വമ്പൻ ബോളിവുഡ് ചിത്രങ്ങൾ പോലുമുണ്ടായിരുന്നു,” ശിൽപ്പ ഷെട്ടി കൂട്ടിച്ചേർത്തു. കുടുംബത്തിനും മക്കളുടെ വളർച്ചയ്ക്കും പ്രാധാന്യം നൽകിയതിനാലാണ് പല വലിയ പ്രോജക്ടുകളും അന്ന് നിരസിക്കേണ്ടി വന്നതെന്നാണ് താരം സൂചിപ്പിക്കുന്നത്.
Story Summary: Bollywood actress Shilpa Shetty expressed her desire to return to the big screen, mainly for her children, Samisha and Viaan, who have never seen her movies in a commercial theater. In a recent interview, she revealed that she wants to do a proper theater-release film, while also disclosing that she had previously rejected several major movie offers for genuine personal reasons.
