ബംഗളൂരു: ബംഗളൂരുവിലെ തന്റെ വസതിയിൽ ബിസിനസ്സുകാരനായ വൈശാഖ് മരിച്ച സംഭവത്തിൽ ആദ്യമായി പ്രതികരിച്ച് കന്നഡ നടി കൃഷി തപണ്ട. തന്റെ വീട്ടിൽ വെച്ച് ഇത്തരമൊരു ദാരുണമായ സംഭവം നടക്കുമെന്ന് ഒരിക്കലും കരുതിയിരുന്നില്ലെന്നും, ഇത് വലിയ മാനസികാഘാതമാണ് തനിക്ക് നൽകിയതെന്നും കൃഷി ഇൻസ്റ്റാഗ്രാം കുറിപ്പിലൂടെ വ്യക്തമാക്കി (Krishi Thapanda Statement). സംഭവത്തിന് ശേഷം ഉയർന്നുവരുന്ന വ്യാജ വാർത്തകളും അനാവശ്യമായ അഭ്യൂഹങ്ങളും തന്നെയും വൈശാഖിന്റെ കുടുംബത്തെയും ഒരുപോലെ വേദനിപ്പിക്കുകയാണെന്നും അവർ പറഞ്ഞു.
“എന്റെ ഹൃദയത്തോട് ചേർന്നുനിന്നിരുന്ന, എന്നെ സംരക്ഷിക്കുകയും സ്നേഹിക്കുകയും ചെയ്ത ഒരാളെയാണ് എനിക്ക് നഷ്ടമായത്. ഈ വേർപാട് വാക്കുകൾ കൊണ്ട് വിവരിക്കാനാവില്ല. ദുഃഖിക്കാൻ പോലും സമയം ലഭിക്കാത്ത അവസ്ഥയിലാണ് ഇപ്പോഴുള്ളത്. ഒരാളുടെ മരണത്തെ കഥകളാക്കി മാറ്റാനുള്ള ശ്രമങ്ങൾ ക്രൂരമാണ്,” കൃഷി ഇൻസ്റ്റാഗ്രാമിൽ കുറിച്ചു. വൈശാഖിന്റെ കുടുംബത്തിന്റെയും സുഹൃത്തുക്കളുടെയും വേദനയെ മാനിക്കണമെന്നും ഇത്തരം കാര്യങ്ങളിൽ നിരുത്തരവാദപരമായ പ്രചാരണങ്ങൾ നടത്തരുതെന്നും താരം അഭ്യർത്ഥിച്ചു.
ഒരു കുടുംബത്തിന് അവരുടെ മകനെയാണ് നഷ്ടമായതെന്ന് ഓർക്കണമെന്ന് കൃഷി പറഞ്ഞു. “നിങ്ങൾക്ക് ഒരാളെ സന്തോഷിപ്പിക്കാൻ കഴിയില്ലെങ്കിൽ, അവരുടെ കണ്ണീരിന് കാരണക്കാരാകാതിരിക്കുക. ആർക്കും ജീവിക്കാനുള്ള പ്രചോദനം നൽകാൻ കഴിയില്ലെങ്കിൽ, അവർക്ക് പ്രതീക്ഷ നഷ്ടപ്പെടുത്തുന്ന പ്രവർത്തികൾ ഒഴിവാക്കുക,” അവർ കൂട്ടിച്ചേർത്തു. വൈശാഖിന്റെ കുടുംബത്തിനും സുഹൃത്തുക്കൾക്കും ഈ അവസ്ഥയിൽ സമാധാനത്തോടെ ദുഃഖിക്കാൻ ആവശ്യമായ സ്വകാര്യതയും അന്തസ്സും നൽകണമെന്നും കൈകൂപ്പി അപേക്ഷിച്ചുകൊണ്ട് കൃഷി തപണ്ട പറഞ്ഞു. അനാവശ്യ കമന്റുകൾ ഒഴിവാക്കാൻ പോസ്റ്റിലെ കമന്റ് ബോക്സ് താരം ഡിസേബിൾ ചെയ്തിട്ടുണ്ട്.
Summary: Kannada actor Krishi Thapanda has issued her first public statement following the tragic death of businessman Vaishak at her residence in Bengaluru. Expressing deep emotional distress, Thapanda slammed the “constant speculations and assumptions” surrounding the incident, which she says have deprived her and the victim’s family of the space needed to grieve. She honored Vaishak’s memory, describing him as a close friend who protected and cared for her, and made an impassioned plea for compassion, urging the public to stop turning a personal tragedy into sensationalist stories and to respect the privacy of those mourning.
