ബോളിവുഡിൽ വർഷങ്ങൾക്ക് മുൻപിറങ്ങിയ സിനിമകളിലെ രംഗങ്ങളും അവയെച്ചൊല്ലിയുള്ള ഗോസിപ്പുകളും വീണ്ടും സജീവ ചർച്ചയാകാറുണ്ട് (Kangana Ranaut). അത്തരത്തിൽ 2014-ൽ പുറത്തിറങ്ങിയ ‘റിവോൾവർ റാണി’ എന്ന ചിത്രത്തിലെ ഒരു ചുംബനരംഗത്തെക്കുറിച്ചുള്ള വ്യാജവാർത്തകളാണ് ഇപ്പോൾ സോഷ്യൽ മീഡിയയിൽ വീണ്ടും പുകയുന്നത്. ചിത്രത്തിലെ ചുംബനരംഗത്തിനിടയിൽ നടി കങ്കണ റണാവത്ത് സഹനടൻ വീർ ദാസിന്റെ ചുണ്ടുകടിച്ചു ചോര പൊടിപ്പിച്ചു എന്നായിരുന്നു പ്രചാരണം. ഒരു മുതിർന്ന മാധ്യമപ്രവർത്തകയുടെ അഭിമുഖത്തിന് പിന്നാലെ ഈ പഴയ കഥ വീണ്ടും വൈറലായതോടെ, സത്യാവസ്ഥ വെളിപ്പെടുത്തി ഇരുതാരങ്ങളും രംഗത്തെത്തിയിരിക്കുകയാണ്.
പ്രചരിക്കുന്ന വാർത്തകളെല്ലാം ശുദ്ധ അസംബന്ധമാണെന്ന് നടനും കോമഡിയനുമായ വീർ ദാസ് വ്യക്തമാക്കി. സോഷ്യൽ മീഡിയ പ്ലാറ്റ്ഫോമായ എക്സിലൂടെയായിരുന്നു (X) താരത്തിന്റെ പ്രതികരണം. സിനിമയുടെ സെറ്റിൽ കങ്കണ തികച്ചും പ്രൊഫഷണൽ ആയിരുന്നെന്നും പ്രചരിക്കുന്ന കഥകളെല്ലാം വെറും ഭാവന മാത്രമാണെന്നും വീർ ദാസ് കുറിച്ചു. കങ്കണ കഴിവും സർഗ്ഗാത്മകതയുമുള്ള മികച്ചൊരു കലാകാരിയാണ്. അവർക്കെതിരെ നടക്കുന്ന ഇത്തരം അപവാദ പ്രചാരണങ്ങൾ തികച്ചും തെറ്റാണെന്നും അദ്ദേഹം കൂട്ടിച്ചേർത്തു.
തങ്ങൾക്കിടയിലുള്ള രാഷ്ട്രീയപരമായ ഭിന്നതകളെക്കുറിച്ചും വീർ ദാസ് തുറന്നുപറഞ്ഞു. തന്റെ കോമഡി ഷോകളുടെ പേരിൽ കങ്കണ മുൻപ് പരസ്യമായി കുറ്റപ്പെടുത്തിയിട്ടുണ്ടാകാം, എന്നാൽ സിനിമയുടെ സെറ്റിൽ തങ്ങൾക്കിടയിൽ യാതൊരുവിധ പ്രശ്നങ്ങളും ഉണ്ടായിട്ടില്ലെന്ന് താരം വ്യക്തമാക്കി. വ്യക്തിപരമായ വിയോജിപ്പുകൾ ഉണ്ടെങ്കിലും കങ്കണയ്ക്കെതിരേ നടക്കുന്ന ഇത്തരമൊരു കുപ്രചാരണത്തെ പിന്തുണയ്ക്കാൻ കഴിയില്ലെന്ന നിലപാടിലാണ് വീർ ദാസ്.
വീർ ദാസിന്റെ പോസ്റ്റ് പങ്കുവെച്ചുകൊണ്ട് കങ്കണ റണാവത്തും മാധ്യമപ്രവർത്തകയ്ക്കെതിരെ കടുത്ത ഭാഷയിൽ വിമർശനവുമായി രംഗത്തെത്തി. “ആരോപണം ഉന്നയിച്ച ആ സ്ത്രീ ഏതോ ഒരു വിചിത്ര ജീവിയാണ്. അവരുടെ ലൈംഗിക വൈകൃതങ്ങൾക്ക് (Sex Fantasies) വേണ്ടി നമ്മുടെ പേരുകൾ ഉപയോഗിക്കുകയാണെന്ന് തോന്നുന്നു. ഞാൻ നിന്റെ രക്തം കുടിച്ചെന്നും, ഒരു പതിറ്റാണ്ടിന് ശേഷവും നീ ആ ആഘാതത്തിലാണെന്നുമൊക്കെ പറയുന്നത് വിചിത്രമാണ്,” കങ്കണ എക്സിൽ കുറിച്ചു. തനിക്കൊപ്പം നിന്നതിന് വീർ ദാസിന് നടി നന്ദി പറയുകയും ചെയ്തു.
നേരത്തെ 2023-ലും സമാനമായ രീതിയിൽ ഈ ചുംബന വിവാദം ഉയർന്നപ്പോൾ കങ്കണ ഇൻസ്റ്റാഗ്രാമിലൂടെ പരിഹാസവുമായി എത്തിയിരുന്നു. “ഹൃത്വിക് റോഷന് ശേഷം ഞാൻ പാവം വീർ ദാസിന്റെ മാന്യതയും കളഞ്ഞോ? ഇതെപ്പോഴാണ് സംഭവിച്ചത്?” എന്നായിരുന്നു അന്ന് കങ്കണ ചോദിച്ചത്. സായ് കബീർ സംവിധാനം ചെയ്ത ‘റിവോൾവർ റാണി’യിൽ കങ്കണയും വീർ ദാസുമായിരുന്നു പ്രധാന വേഷങ്ങളിൽ എത്തിയത്. 2021-ൽ വീർ ദാസ് അവതരിപ്പിച്ച ഒരു കോമഡി ഷോയിൽ ഇന്ത്യയിലെ സ്ത്രീ സുരക്ഷയെക്കുറിച്ച് പരാമർശിച്ചതിനെതിരെ കങ്കണ രംഗത്തുവരികയും, വീർ ദാസിന്റെ കോമഡിയെ ‘സോഫ്റ്റ് ടെററിസം’ എന്ന് വിശേഷിപ്പിക്കുകയും ചെയ്തിരുന്നു. നിലവിൽ ഹിമാചൽ പ്രദേശിലെ മാണ്ഡിയിൽ നിന്നുള്ള ബിജെപി എംപി കൂടിയാണ് കങ്കണ റണാവത്ത്.
Story Summary:
Actors Kangana Ranaut and Vir Das dismissed long-standing rumors claiming Kangana bit Vir’s lip during a kissing scene in their 2014 film ‘Revolver Rani’. Vir Das called the viral story complete nonsense, while Kangana slammed the journalist for creating weird fantasies using their names.
