ചെന്നൈ: തെന്നിന്ത്യൻ സിനിമാപ്രേമികളുടെ ഹൃദയം കവർന്ന ’96’, ‘മെയ്യഴഗൻ’ എന്നീ ചിത്രങ്ങൾക്ക് ശേഷം സംവിധായകൻ സി. പ്രേം കുമാർ ഒരുക്കുന്ന പുതിയ തമിഴ് സിനിമയ്ക്ക് തുടക്കമായി (Fahadh Faasil new Tamil movie). മലയാളത്തിന്റെ പ്രിയനടൻ ഫഹദ് ഫാസിലും ശിവദയും കേന്ദ്ര കഥാപാത്രങ്ങളായി എത്തുന്ന ചിത്രത്തിന്റെ പൂജാ ചടങ്ങുകൾ ചെന്നൈയിൽ നടന്നു. താൽക്കാലികമായി ‘പ്രൊഡക്ഷൻ നമ്പർ 32’ എന്ന് പേരിട്ടിരിക്കുന്ന ഈ ചിത്രം ഒരു ആക്ഷൻ ത്രില്ലർ ജോണറിലാണ് ഒരുങ്ങുന്നത്.
തമിഴിൽ വടിവേലുവിനൊപ്പം അഭിനയിച്ച ‘മാരീസൻ’ എന്ന ചിത്രത്തിന് ശേഷം ഫഹദ് ഫാസിൽ എത്തുന്ന പ്രൊജക്റ്റാണിത്. ഫഹദ് തമിഴിൽ നായകനായി മാത്രം (Solo Lead) അഭിനയിക്കുന്ന ആദ്യ ചിത്രം എന്ന സവിശേഷതയും ഈ സിനിമയ്ക്കുണ്ട്. മഹേഷ് നാരായണന്റെ ‘പാട്രിയറ്റ്’ എന്ന ചിത്രത്തിൽ ഇരുവരും മുൻപ് ഒരുമിച്ച് അഭിനയിച്ചിട്ടുണ്ടെങ്കിലും, ഫഹദും ശിവദയും ആദ്യമായി ഒരു സിനിമയിൽ നായകനും നായികയുമായി ഒന്നിക്കുന്നത് ഈ ചിത്രത്തിലാണ്.
തന്റെ മുൻ ചിത്രങ്ങളിൽ നിന്നും തികച്ചും വ്യത്യസ്തമായ ഒരു അനുഭവമായിരിക്കും ഇതെന്നും കഴിഞ്ഞ നാല് വർഷമായി മനസ്സിൽ കൊണ്ടുനടക്കുന്ന കഥയാണിതെന്നും സംവിധായകൻ സി. പ്രേം കുമാർ വെളിപ്പെടുത്തി. റൊമാന്റിക്-ഫീൽ ഗുഡ് ചിത്രങ്ങളിൽ നിന്നും മാറി ഒരു ത്രില്ലർ ജോണറിലേക്ക് പോകരുതെന്ന് പലരും ഉപദേശിച്ചിരുന്നതായും അദ്ദേഹം പറഞ്ഞു.
“കഥയുടെ ആദ്യ 45 മിനിറ്റ് മാത്രം കേട്ടപ്പോൾ തന്നെ ഫഹദ് സാർ അതിയായ ആവേശം പ്രകടിപ്പിച്ചു. അതാണ് ഈ സിനിമയുമായി മുന്നോട്ട് പോകാൻ എനിക്ക് വലിയ ആത്മവിശ്വാസം നൽകിയത്. ഇത് പൂർണ്ണമായും ഒരു ഡയറക്ട് തമിഴ് സിനിമയായിരിക്കും.” – സി. പ്രേം കുമാർ വ്യക്തമാക്കി.
സി. പ്രേം കുമാറിന്റെ മുൻ ചിത്രങ്ങളിലെ സ്ഥിരം സഹപ്രവർത്തകനും ഹിറ്റ് മേക്കറുമായ ഗോവിന്ദ് വസന്തയാണ് ഈ ചിത്രത്തിനും സംഗീത സംവിധാനം നിർവ്വഹിക്കുന്നത്. ‘മെയ്യഴഗൻ’ സിനിമയുടെ ഛായാഗ്രാഹകനായ മഹേന്ദ്രൻ ജയരാജു ക്യാമറ കൈകാര്യം ചെയ്യുമ്പോൾ, ആർ. ഗോവിന്ദരാജാണ് എഡിറ്റിംഗ് നിർവ്വഹിക്കുന്നത്.
വേൽസ് ഫിലിം ഇന്റർനാഷണലും മൺസൂൺ മൂവീസും ചേര്ന്ന് നിർമ്മിക്കുന്ന ചിത്രം ഇഷാരി കെ. ഗണേഷ് ആണ് അവതരിപ്പിക്കുന്നത്. ചേതൻ, ഹരീഷ് ഉത്തമൻ, കരുണാകരൻ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. പി ആർ ഓ: പ്രതീഷ് ശേഖർ.
Story Summary : Director C. Prem Kumar of ’96’ and ‘Meiyazhagan’ fame has launched his new action-thriller movie starring Fahadh Faasil and Sshivada in lead roles. Temporarily titled ‘Production No. 32’, the film marks Fahadh’s first solo-lead Tamil film, with music composed by Govind Vasantha.
