കൊച്ചി: കഠിനമായ ഫിറ്റ്നസ് യാത്രയിലൂടെ തന്റെ ശരീരവടിവും ആത്മവിശ്വാസവും വീണ്ടെടുത്ത് നൃത്തച്ചുവടുകളുമായി തിരിച്ചെത്തിയ സന്തോഷം പങ്കുവെച്ച് നടി ഗ്രേസ് ആന്റണി. ‘ഡെസ്സേർട്ട്’ (Grace Antony dance video) എന്ന ജനപ്രിയ ഇംഗ്ലീഷ് ഗാനത്തിനൊപ്പം താരം കളിച്ച തകർപ്പൻ ഡാൻസ് വീഡിയോ സോഷ്യൽ മീഡിയയിൽ ഇതിനകം തരംഗമായിക്കഴിഞ്ഞു. ശാരീരിക ബുദ്ധിമുട്ടുകളും അമിതഭാരവും കാരണം ദീർഘനാളായി തനിക്ക് നൃത്തം ചെയ്യാൻ സാധിച്ചിരുന്നില്ലെന്ന് വീഡിയോയ്ക്കൊപ്പം പങ്കുവെച്ച കുറിപ്പിൽ ഗ്രേസ് തുറന്നുപറയുന്നു.
വീണ്ടും നൃത്തച്ചുവടുകൾ വെക്കാൻ കഴിഞ്ഞ നിമിഷത്തെ ‘തന്നിലേക്ക് താൻ തന്നെ തിരികെ വന്ന മനോഹരമായ ദിവസം’ എന്നാണ് താരം വിശേഷിപ്പിച്ചത്. ആരോഗ്യപ്രശ്നങ്ങളും പെട്ടെന്നുണ്ടായ ശരീരഭാരവും തന്നെ മാനസികമായി ഏറെ തളർത്തിയെന്നും, ഒരു ചുവടുപോലും വെക്കാൻ കഴിയാത്ത അവസ്ഥയിൽ നിന്നും കഠിനപ്രയത്നത്തിലൂടെയാണ് മെയ് വഴക്കം തിരിച്ചുപിടിച്ചതെന്നും ഗ്രേസ് കുറിച്ചു. ഈ മാറ്റത്തിലേക്കുള്ള യാത്ര ഒട്ടും എളുപ്പമായിരുന്നില്ലെങ്കിലും ലക്ഷ്യത്തിലെത്താൻ കഴിഞ്ഞതിൽ സന്തോഷമുണ്ടെന്ന് താരം കൂട്ടിച്ചേർത്തു.
2016-ൽ പുറത്തിറങ്ങിയ ‘ഹാപ്പി വെഡ്ഡിങ്’ എന്ന ചിത്രത്തിലൂടെ സിനിമാരംഗത്തേക്ക് കടന്നുവന്ന ഗ്രേസ് ആന്റണി, ‘കുമ്പളങ്ങി നൈറ്റ്സ്’ എന്ന ചിത്രത്തിലെ പ്രകടനത്തിലൂടെയാണ് മലയാളി പ്രേക്ഷകരുടെ പ്രിയങ്കരിയായി മാറിയത്. തുടർന്ന് റോഷാക്ക്, അപ്പൻ, നുണക്കുഴി തുടങ്ങിയ നിരവധി സൂപ്പർഹിറ്റ് സിനിമകളിലൂടെയും വെബ് സീരീസുകളിലൂടെയും താരം തന്റെ അഭിനയമികവ് തെളിയിച്ചു. മമ്മൂട്ടിയും മോഹൻലാലും ഒന്നിച്ച മഹേഷ് നാരായണൻ ചിത്രം ‘പേട്രിയറ്റ്’, ബിജു മേനോൻ നായകനാകുന്ന ‘അവറാച്ചൻ ആൻഡ് സൺസ്’ എന്നിവയാണ് ഗ്രേസിന്റെ ഏറ്റവും പുതിയ ചിത്രങ്ങൾ.
View this post on Instagram
Story Summary: Malayalam actress Grace Antony shared an energetic dance video on Instagram, celebrating her return to dancing after a successful fitness transformation. She revealed that weight gain and health issues had left her emotionally drained and unable to move, making this comeback a deeply personal milestone.
