ചെന്നൈ: തമിഴ്നാട്ടിലെ തിരുപ്പൂർ ജില്ലയിൽ മൂന്ന് വയസ്സ് മാത്രം പ്രായമുള്ള പെൺകുട്ടി ക്രൂരമായ ലൈംഗിക പീഡനത്തെ തുടർന്ന് മരിച്ചു (3 year old girl dies sexual assault Tamil Nadu). രാജ്യത്തെ ഒന്നടങ്കം നടുക്കിയ ഈ ദാരുണ സംഭവത്തിൽ കുട്ടിയുടെ അയൽവാസിയും ഇതരസംസ്ഥാന തൊഴിലാളിയുമായ യുവാവിനെ പോലീസ് അറസ്റ്റ് ചെയ്തു. കുട്ടിയുടെ മാതാപിതാക്കൾ ജോലിക്കായി പോയ സമയത്താണ് പ്രതി ഈ ക്രൂരത ചെയ്തത്.
പോലീസ് നൽകുന്ന വിവരമനുസരിച്ച്, തിരുപ്പൂരിൽ ഒരേ നിർമ്മാണ മേഖലയിൽ ഒന്നിച്ച് ജോലി ചെയ്യുന്ന ഇതരസംസ്ഥാന തൊഴിലാളികളുടെ കുടുംബങ്ങളാണ് ഇവിടെ താമസിച്ചിരുന്നത്. സംഭവദിവസം കുട്ടിയുടെ മാതാപിതാക്കൾ പതിവുപോലെ ജോലിക്ക് പോയതായിരുന്നു. ഈ സമയം വീട്ടിൽ തനിച്ചായിരുന്ന പെൺകുട്ടിയെ പ്രതി തന്ത്രപൂർവ്വം തന്റെ മുറിയിലേക്ക് കൂട്ടിക്കൊണ്ടുപോയി ക്രൂരമായ ലൈംഗിക പീഡനത്തിന് ഇരയാക്കുകയായിരുന്നു.
മാതാപിതാക്കൾ തിരികെ എത്തിയപ്പോൾ കുട്ടി ബോധരഹിതയായി കിടക്കുന്നതാണ് കണ്ടത്. ശരീരത്തിൽ കടുത്ത പരിക്കുകളോടെ ചോരയൊലിപ്പിച്ചു കിടന്ന കുട്ടിയെ ഉടൻ തന്നെ തിരുപ്പൂർ സർക്കാർ ആശുപത്രിയിൽ എത്തിച്ചെങ്കിലും ആന്തരിക രക്തസ്രാവവും കടുത്ത ആഘാതവും കാരണം ജീവൻ രക്ഷിക്കാനായില്ല. കുട്ടി മരണപ്പെട്ടതോടെ ആശുപത്രി അധികൃതർ പോലീസിൽ വിവരമറിയിക്കുകയായിരുന്നു.
തുടർന്ന് നടത്തിയ പ്രാഥമിക പോസ്റ്റുമോർട്ടം റിപ്പോർട്ടിൽ കുട്ടി കടുത്ത ലൈംഗിക പീഡനത്തിന് ഇരയായതായി സ്ഥിരീകരിച്ചു. ഇതോടെ കുട്ടിയുടെ അയൽവാസിയായ പ്രതിയെ പോലീസ് ഒളിത്താവളത്തിൽ നിന്ന് വളഞ്ഞ് പിടികൂടുകയായിരുന്നു. പ്രതിക്കെതിരെ കൊലപാതക കുറ്റത്തിനും (Murder) കടുത്ത പോക്സോ (POCSO Act) നിയമപ്രകാരവും കേസെടുത്തിട്ടുണ്ട്. പ്രതിയെ കോടതിയിൽ ഹാജരാക്കി റിമാൻഡ് ചെയ്തതായും കേസിൽ അതിവേഗ വിചാരണ ഉറപ്പാക്കുമെന്നും തിരുപ്പൂർ പോലീസ് സൂപ്രണ്ട് അറിയിച്ചു.
