കരീംനഗർ: തെലങ്കാനയിലെ കരീംനഗറിൽ (Karimnagar) വലിയൊരു ദുരന്തം ഒഴിവായി (Electric RTC bus caught fire Karimnagar). കരീംനഗർ-2 ഡിപ്പോയിൽ നിന്നുള്ള തെലങ്കാന സ്റ്റേറ്റ് റോഡ് ട്രാൻസ്പോർട്ട് കോർപ്പറേഷന്റെ (TGSRTC) ഇലക്ട്രിക് ബസിന് തീപിടിച്ച് പൂർണ്ണമായും കത്തിയമർന്നു. ഞായറാഴ്ച രാവിലെ കരീംനഗറിൽ നിന്ന് ഹൈദരാബാദിലേക്ക് പോവുകയായിരുന്ന ബസിനാണ് തിമ്മാപ്പൂർ മണ്ഡലിലെ ലോവർ മനാഇർ ഡാമിന് (LMD) സമീപം വെച്ച് തീപിടിച്ചത്. എന്നാൽ പുക ഉയരുന്നത് കണ്ട് ഡ്രൈവർ വാഹനം പെട്ടെന്ന് നിർത്തി യാത്രക്കാരെ ഇറക്കിയതിനാൽ വൻ ദുരന്തമാണ് ഒഴിവായത്.
ഏകദേശം 37-ലധികം യാത്രക്കാരുമായാണ് ബസ് സർവീസ് നടത്തിയിരുന്നത്. അലുകുനൂർ കവലയ്ക്ക് സമീപമെത്തിയപ്പോൾ ബസിൽ നിന്ന് പെട്ടെന്ന് തീപ്പൊരിയും പുകയും ഉയരുന്നത് ഡ്രൈവറുടെ ശ്രദ്ധയിൽപ്പെട്ടു. അപകടം മണത്ത ഡ്രൈവർ ഉടൻ തന്നെ ബസ് റോഡരികിലേക്ക് ഒതുക്കി നിർത്തുകയും കണ്ടക്ടറുടെ സഹായത്തോടെ പ്രധാന വാതിലുകളും എമർജൻസി എക്സിറ്റുകളും തുറന്ന് യാത്രക്കാരെ സുരക്ഷിതമായി പുറത്തെത്തിക്കുകയായിരുന്നു.
യാത്രക്കാർ ഇറങ്ങി നിമിഷങ്ങൾക്കകം തന്നെ തീ ബസിലേക്ക് ആളിപ്പടരുകയും വാഹനം പൂർണ്ണമായി വിഴുങ്ങുകയും ചെയ്തു. വിവരമറിഞ്ഞ് സ്ഥലത്തെത്തിയ ഫയർഫോഴ്സ് സംഘം ഏറെ പരിശ്രമിച്ചാണ് തീ നിയന്ത്രണവിധേയമാക്കിയത്. അപ്പോഴേക്കും ബസിന്റെ അസ്ഥികൂടം മാത്രമാണ് അവശേഷിച്ചിരുന്നത്. സാങ്കേതിക തകരാറോ അല്ലെങ്കിൽ ഷോട് സർക്യൂട്ടോ ആകാം അപകടത്തിന് കാരണമായതെന്നാണ് പ്രാഥമിക നിഗമനം. സംഭവത്തെത്തുടർന്ന് കരീംനഗർ-ഹൈദരാബാദ് ദേശീയപാതയിൽ അല്പസമയം ഗതാഗതം തടസ്സപ്പെട്ടു.
