കൊച്ചി: രാജ്യത്തെ മുൻനിര നോൺ-ബാങ്കിംഗ് ധനകാര്യ സ്ഥാപനമായ (NBFC) ഇൻഡെൽ മണിയുടെ വിദേശനാണ്യ വിനിമയ വിഭാഗമായ ഇൻഡെൽ റെമിറ്റിന് ട്രേഡ് റെമിറ്റൻസ് സേവനങ്ങൾ നൽകുന്നതിനായി റിസർവ് ബാങ്ക് ഓഫ് ഇന്ത്യയുടെ (RBI) അനുമതി ലഭിച്ചു (Indel Money Indel Remit RBI approval). ഇതിനായി സ്ഥിര ലൈസൻസ് ലഭ്യമായതോടെ കമ്പനിക്ക് വിദേശനാണ്യ വിനിമയ വിപണിയിലെ സാന്നിധ്യം കൂടുതൽ ശക്തമാക്കാൻ സാധിക്കും.
മുംബൈ ആസ്ഥാനമായി പ്രവർത്തിക്കുന്ന ഇൻഡെൽ റെമിറ്റിന് നിലവിൽ ആർ.ബി.ഐയുടെ ഓതറൈസ്ഡ് ഡീലർ കാറ്റഗറി-2 (AD Category-II) ലൈസൻസുണ്ട്. പുതിയ അനുമതി കൂടി ലഭിച്ചതോടെ സമ്മാനങ്ങൾ, സംഭാവനകൾ എന്നിവയൊഴികെയുള്ള ഏത് നോൺ-ട്രേഡ് കറന്റ് അക്കൗണ്ട് ഇടപാടുകളും ഒരു ഇടപാടിൽ 25 ലക്ഷം രൂപ വരെയുള്ള വിദേശ വ്യാപാര ഇടപാടുകളും (Trade Remittance) നടത്താൻ ഇൻഡെൽ റെമിറ്റിന് സാധിക്കും.
പുതിയ ലൈസൻസ് ലഭിച്ചതിലൂടെ വ്യാപാരികൾക്ക് 25 ലക്ഷം രൂപ വരെയുള്ള അന്താരാഷ്ട്ര പണമിടപാടുകൾ കൂടുതൽ വേഗത്തിലും സുരക്ഷിതമായും പൂർത്തിയാക്കാവുന്നതാണെന്ന് ഇൻഡെൽ മണി എക്സിക്യൂട്ടീവ് ഡയറക്ടറും സി.ഇ.ഒയുമായ ഉമേഷ് മോഹനൻ പറഞ്ഞു. സമ്പൂർണ്ണ വിദേശനാണ്യ വിനിമയ പ്ലാറ്റ്ഫോം കെട്ടിപ്പടുക്കുന്നതിൽ ഇതൊരു സുപ്രധാന നാഴികക്കല്ലാണെന്നും, കേന്ദ്ര ബാങ്കിന്റെ നിയമങ്ങളും നിയന്ത്രണങ്ങളും കർശനമായി പാലിച്ചുകൊണ്ട് ഉപഭോക്താക്കൾക്ക് കൂടുതൽ കാര്യക്ഷമമായ അന്താരാഷ്ട്ര വിനിമയ സേവനങ്ങൾ ലഭ്യമാക്കുകയാണ് കമ്പനിയുടെ ലക്ഷ്യമെന്നും അദ്ദേഹം വ്യക്തമാക്കി.
Story Summary: Indel Remit, the foreign exchange division of Indel Money, has received RBI authorization to offer trade remittance services. Operating under an AD Category-II license, the approval allows Indel Remit to facilitate cross-border trade transactions of up to ₹25 lakh, enhancing its forex service ecosystem.
