ബെംഗളൂരു: പൊതുഗതാഗത ബസിൽ നഷ്ടപ്പെട്ട പേഴ്സ് ഒരു ദിവസം മുഴുവൻ സുരക്ഷിതമായി സൂക്ഷിച്ച് യഥാർഥ ഉടമയ്ക്ക് തിരികെ നൽകിയ ബസ് കണ്ടക്ടറുടെ സത്യസന്ധതയാണ് സോഷ്യൽ മീഡിയയിൽ ശ്രദ്ധ നേടുന്നത്. ബെംഗളൂരു മെട്രോപൊളിറ്റൻ ട്രാൻസ്പോർട്ട് കോർപ്പറേഷൻ (BMTC) ബസിലെ ജീവനക്കാരന്റെ ഈ പ്രവൃത്തി നിരവധി പേരുടെ അഭിനന്ദനം നേടുകയാണ്. ( Lost Wallet Returned By Bus Conductor)
സംഭവം പുറത്തറിഞ്ഞത് ഒരു കോളജ് വിദ്യാർഥി സോഷ്യൽ മീഡിയയിൽ പങ്കുവെച്ച കുറിപ്പിലൂടെയാണ്. ഉല്ലാല സാറ്റലൈറ്റ് ടൗൺ ഡിപ്പോയിലേക്ക് പോകുന്ന 234A നമ്പർ BMTC ബസിൽ യാത്ര ചെയ്യുന്നതിനിടെയാണ് പേഴ്സ് നഷ്ടമായത്. എന്നാൽ പിറ്റേന്ന് രാവിലെയാണ് പേഴ്സ് കാണാതായ വിവരം വിദ്യാർഥി തിരിച്ചറിഞ്ഞത്. പേഴ്സിൽ ബസ് പാസ്, മെട്രോ കാർഡ്, ചെറിയൊരു തുക എന്നിവ മാത്രമാണ് ഉണ്ടായിരുന്നതെന്ന് വിദ്യാർഥി കുറിച്ചു. വൈകുന്നേരം ബന്ധപ്പെട്ട ഡിപ്പോയിലെ ടൈംകീപ്പറുടെ ഓഫീസിലെത്തി അന്വേഷിച്ചപ്പോഴാണ് അപ്രതീക്ഷിതമായ അനുഭവമുണ്ടായത്.
Lost my wallet in a BMTC bus, recovered it at the depot a day later
by
u/Individual-Lime8216 in
bangalore
വിദ്യാർഥിയുടെ മുഖം തിരിച്ചറിഞ്ഞ ബസ് കണ്ടക്ടർ നേരിട്ട് വിളിച്ച് പേഴ്സ് കൈമാറുകയായിരുന്നു. ബസിൽ നിന്ന് പേഴ്സ് ലഭിച്ചതോടെ അത് സുരക്ഷിതമായി സൂക്ഷിച്ചിരുന്നുവെന്നും ബന്ധപ്പെടാൻ ഫോൺ നമ്പറോ മറ്റ് വിവരങ്ങളോ ഇല്ലാത്തതിനാൽ അടുത്ത ദിവസം പ്രധാന ഡിപ്പോയിൽ നിന്ന് വിവരങ്ങൾ കണ്ടെത്താനോ, അതും സാധിച്ചില്ലെങ്കിൽ വിദ്യാർഥിയുടെ കോളജിൽ എത്തിക്കാനോ പദ്ധതിയിട്ടിരുന്നുവെന്നും കണ്ടക്ടർ അറിയിച്ചതായി വിദ്യാർഥി പറഞ്ഞു. BMTC ജീവനക്കാർ വളരെ സഹായകരമായ സമീപനമാണ് സ്വീകരിച്ചതെന്നും എന്തെങ്കിലും സാധനങ്ങൾ ബസിൽ നഷ്ടമായാൽ ബന്ധപ്പെട്ട റൂട്ടിന്റെ പ്രധാന ഡിപ്പോയിലെ ടൈംകീപ്പറെയോ സ്റ്റേഷൻ മാസ്റ്ററെയോ സമീപിക്കുന്നത് നല്ലതാണെന്നും വിദ്യാർഥി മറ്റുള്ളവരോട് നിർദേശിച്ചു. സോഷ്യൽ മീഡിയയിൽ ഈ അനുഭവം വൈറലായതോടെ കണ്ടക്ടറുടെ സത്യസന്ധതയെ പ്രശംസിച്ച് നിരവധി പേരാണ് രംഗത്തെത്തിയത്. ഇത്തരം വാർത്തകൾ ഇന്നത്തെ കാലത്ത് വലിയ പ്രതീക്ഷ നൽകുന്നതാണെന്ന് ചിലർ അഭിപ്രായപ്പെട്ടു.
മറ്റുചിലർ തങ്ങൾക്കും BMTC ജീവനക്കാരിൽ നിന്ന് സമാനമായ സഹായം ലഭിച്ച അനുഭവങ്ങൾ പങ്കുവെച്ചു. 2019-ൽ ബസിൽ നഷ്ടപ്പെട്ട മൊബൈൽ ഫോൺ പിന്നീട് ഡിപ്പോയിൽ നിന്ന് തിരികെ ലഭിച്ച സംഭവവും, ഓട്ടോറിക്ഷയിൽ നഷ്ടപ്പെട്ട പേഴ്സ് ദിവസങ്ങൾക്കുശേഷം തിരികെ കിട്ടിയ അനുഭവവും പലരും കമന്റുകളിലൂടെ പങ്കുവെച്ചു.
Summary: A BMTC bus conductor in Bengaluru has won praise after safely keeping a college student’s lost wallet and returning it the next day. The student’s social media post appreciating the conductor’s honesty has gone viral, with many people sharing similar heartwarming experiences.
